МАДРИД, 27 май. /“Дунё” АА/. Испаниянинг “Onda Cero” портали “Ўзбекистон – футбол бўйича жаҳон чемпионатида Марказий Осиёдаги илк мамлакат” сарлавҳали мақола эълон қилди, деб хабар бермоқда “Дунё” АА мухбири.

Нашрда Ўзбекистон терма жамоаси футбол бўйича жаҳон чемпионатига йўлланма олган Марказий Осиёдаги биринчи жамоа сифатида аллақачон тарихга киргани таъкидланган. Қайд этилишича, мундиаль йўлланмаси саралаш гуруҳида Эрондан кейин иккинчи ўринни эгаллаш орқали қўлга киритилган.

“Onda Cero” асосан маҳаллий Суперлига ва қўшни мамлакатлар, жумладан, Туркия чемпионати ўйинчиларидан таркиб топган Ўзбекистон терма жамоаси халқаро тажриба тўплашда давом этаётганига эътибор қаратган. Шу билан бирга, жамоанинг юқори даражадаги жисмоний тайёргарлиги, тезкорлик ҳамда прессинг ва қарши ҳужумларда самарали ўйин намойиш эта олиши алоҳида урғуланган.

Материалда терма жамоани “Олтин тўп” соҳиби ва Мадриднинг “Реал” клуби собиқ ҳимоячиси Фабио Каннаваро бошқариши алоҳида қайд этилган. Нашр фикрича, унинг бой ўйин тажрибаси жамоага қўшимча ишонч бағишлай олади.

Мақолада таркибнинг ўзаро бир-бирини яхши тушуниб ўйнаши ва футболчиларнинг мунтазам ривожланиб бориши туфайли Ўзбекистон рақобатбардош жамоани шакллантира олгани қайд этилган. Шу билан бирга, плей-офф босқичига чиқиш ўзбек футболи ва унинг мухлислари учун жиддий ютуқ сифатида баҳоланмоқда.