МАДРИД, 17 июнь. /“Дунё” АА/. Испаниянинг етакчи “Orta Lectura” нашрида V Тошкент халқаро инвестиция форумига (ТХИФ-2026) бағишланган мақола эълон қилинди, деб хабар бермоқда “Дунё” АА мухбири.

Мақолада Тошкент жаҳон капиталини ўзига жалб этувчи марказга айланаётгани ҳамда форумда умумий активлари 42 триллион долларни ташкил этувчи инвесторлар бирлашаётгани таъкидланган. 16–18 июнь кунлари “Инвестициялар барқарорлиги: янги уфқлар, янги шериклик” шиори остида ўтаётган ушбу тадбир иштирокчилар сони бўйича рекорд кўрсаткичларни қайд этди.

Форумда қатнашиш учун дунёнинг 100 та давлатидан 8 мингдан ортиқ вакил, жумладан, 3 мингдан зиёд хорижий делегат рўйхатдан ўтган. Улар бошқараётган жами активлар миқдори глобал ялпи ички маҳсулотнинг қарийб 38 фоизига тенг. Иштирокчилар сафида “BlackRock”, “JPMorgan Chase”, “Citibank”, “Goldman Sachs” каби молиявий гигантлар ҳамда “Airbus”, “John Deere”, “Mitsubishi Heavy Industries” сингари саноат етакчилари бор.

Испания нашрининг ёзишича, бу йилги ТХИФ дастури учта асосий йўналишга – геология, критик минераллар, тоза энергетика ва сунъий интеллектни қамраб олган “Янги уфқлар”, Форс кўрфази, Осиё ва Европа капиталини жалб этувчи “Янги шериклик” ҳамда Ўзбекистондаги иқтисодий ислоҳотлар ва қонун устуворлигини акс эттирувчи “Институционал барқарорлик” тамойилларига асосланган.

Тадбирнинг сиёсий нуфузи ҳам катта бўлиб, ҳукумат делегациялари сони ўтган йилги 26 тадан 62 тага кўпайди. Анжуманда Европа тикланиш ва тараққиёт банки президенти Одиль Рено-Бассо ва БРИКС Янги тараққиёт банки президенти Дилма Руссефф каби нуфузли шахслар иштирок этмоқда. Бундан ташқари, форум доирасида “Silk Road Night Run” тунги марафони ва “TIIF Open” теннис турнири каби спорт тадбирлари ҳам ўрин олган.

Мақола якунида “Bloomberg”, “Reuters” ва “BBC” каби дунёнинг етакчи ОАВларидан келган 209 нафар хорижий журналист томонидан ёритиб борилаётган ушбу форум якунлари бўйича имзоланадиган ўнлаб миллиард долларлик битимлар Ўзбекистон ва бутун минтақа иқтисодиётига узоқ муддатли ижобий таъсир кўрсатиши алоҳида эътироф этилган.