ЗАГРЕБ, 30 апрель. /“Дунё” АА/. Марказий Осиё мамлакатлари жадал иқтисодий ўсиш ва энергетик аҳамияти ортиб бораётган муҳим макон сифатида шаклланмоқда, деб хабар беради “Дунё” АА мухбири Хорватиянинг “Poslovni” нашрига таяниб.

Экспертларнинг баҳолашича, минтақа Европанинг ривожланган иқтисодиётларига қараганда анча юқори ўсиш суръатларини намоён этмоқда. Бунга сармоялар, ички талаб ва савдо оқимларининг қайта йўналтирилиши туртки бўлмоқда.

“Қозоғистон нефть, газ ва стратегик ресурсларнинг бой захираларига, жалб қилинган сармояларнинг салмоқли ҳажмига эга минтақанинг энг йирик иқтисодиёти сифатида майдонга чиқмоқда. Ўзбекистон эса ўз навбатида демографик салоҳияти ҳамда иқтисодиётни эркинлаштириш ва юқори қўшимча қийматли ишлаб чиқаришни ривожлантиришга қаратилган ислоҳотлари билан ажралиб туради”, деб ёзилган нашрда.

Мақолада таъкидланишича, минтақанинг иқтисодий ўсиши нафақат ички омиллар, балки геосиёсий вазиятнинг ўзгариши билан ҳам боғлиқ. Хитой, Европа Иттифоқи ва АҚШнинг роли кучайиши фонида Россиянинг мавқеи заифлашиши Марказий Осиёда таъсир ўтказиш учун рақобатни кучайтирмоқда. Бундай шароитда транспорт-логистика инфратузилмасини, аввало, минтақани Россияни четлаб ўтган ҳолда Европа билан боғлайдиган “ўрта йўлак”ни ривожлантириш алоҳида аҳамият касб этади.

Қайд этилишича, Европа Иттифоқи тўғридан-тўғри хорижий инвестицияларнинг 40 фоиздан ортиғини таъминлаб, энг йирик инвестор мақомини сақлаб қолмоқда, ўзаро савдо ҳажми эса сезиларли кўрсаткичларга эришган. Айни вақтда Хитой инфратузилма лойиҳаларини амалга ошириш ва сармоявий фаолликни кучайтириш ҳисобига ўзининг иқтисодий иштирокини фаол кенгайтирмоқда.

Иқтисодий ўсишнинг барқарор суръатларига қарамай, экспертлар ҳамон сақланиб қолаётган таркибий чекловлар, жумладан, хомашё экспортига қарамлик, институционал тўсиқлар ва даромадларнинг нотекис тақсимланишига эътибор қаратмоқда. Шу муносабат билан минтақанинг келгуси тараққиёти кўп жиҳатдан иқтисодиётни диверсификация қилиш, институтларни мустаҳкамлаш ҳамда мамлакатларнинг етакчи ташқи кучлар манфаатларини самарали мувозанатда ушлаб туриш қобилиятига боғлиқ бўлиши алоҳида таъкидланади.

Бундан ташқари, нашрда Хорватиянинг минтақа давлатлари билан иқтисодий ҳамкорликни, хусусан, энергетика лойиҳаларида иштирок этиш орқали фаоллаштиришга интилаётгани қайд этилган.