БИШКЕК, 14 сентябрь. /“Дунё” АА/. Қирғизистоннинг “Альянс-пресс” ахборот-таҳлилий агентлиги порталида Стратегик ва минтақалараро тадқиқотлар институти директори Элдор Арипов ҳамда Кореянинг IFANS институти директори Кан Мён Илнинг минтақавий ҳамкорликни ривожлантиришга бағишланган қўшма мақоласи эълон қилинди, деб хабар бермоқда “Дунё” АА мухбири.

Нашрда “Корея Республикаси – Марказий Осиё” форматининг давлат раҳбарлари даражасига кўтарилиши стратегик қарорлар қабул қилиш босқичига ўтилганини акс эттириши таъкидланади. Биринчи саммит бўлиб ўтадиган кунларда Ўзбекистон Президенти Шавкат Мирзиёевнинг Корея Республикасига давлат ташрифи ҳам амалга оширилиши қайд этилган.

Мақолада сўнгги саккиз йил ичида Сеул билан икки томонлама савдо айланмаси қарийб икки бараварга ошгани, Корея инвестициялари 8 миллиард доллардан ортгани ҳамда Ўзбекистонда Корея капитали иштирокида 700 га яқин корхона фаолият юритаётгани кўрсатиб ўтилган.

Гуманитар алоқаларга, жумладан, Ўзбекистонда 170 минг кишилик корейс диаспораси истиқомат қилаётгани ва Жанубий Кореянинг етакчи олий ўқув юртлари филиаллари фаолият юритаётганига алоҳида урғу берилган. Мамлакатни модернизация қилишдаги Жанубий Корея тажрибаси Марказий Осиё давлатларида рақамлаштириш ва саноат кооперацияси учун юқори амалий аҳамиятга эга экани эътироф этилган.

Хулоса ўрнида, ушбу саммит сунъий интеллект, “яшил” инфратузилма ва муҳим ресурслар соҳаларида узоқ муддатли мулоқот учун мустаҳкам пойдевор яратиши таъкидланган.