ТЕЛЬ-АВИВ, 2 июль. /“Дунё” АА/. “Maariv” журналида Ўзбекистон ва Исроил ўртасидаги иқтисодий ҳамкорликка  бағишланган мақола эълон қилинди, деб хабар бермоқда “Дунё” АА мухбири.

Нашрда қайд этилишича, мазкур ҳамкорликнинг ёрқин намунаси сифатида ўзбекистонлик тадбиркор Баҳодир Мажидов ва Исроилнинг “GCI Gemological Centers” компанияси ўртасида амалга оширилаётган қўшма лойиҳа келтирилган.

Исроилда геммология ҳамда олмосга ишлов бериш технологиялари бўйича таҳсил олган тадбиркор аввал “Expert One” компаниясига асос солган, кейинчалик эса исроиллик ҳамкорлар билан қўшма корхона ташкил этган.

Таъкидланишича, яқинда кучга кирган ҳамкорлик тўғрисидаги битим Марказий Осиёда заргарлик саноатини ривожлантириш, соҳага инвестициялар жалб қилиш ҳамда минтақада сертификатланган қимматбаҳо тошларга бўлган ишончни мустаҳкамлашга хизмат қилади.

Тадбиркорнинг сўзларига кўра, Ўзбекистонда бизнес юритиш учун яратилган қулай муҳит Марказий ва Жануби-Шарқий Осиё, АҚШ ҳамда Европа мамлакатлари компанияларининг қизиқишини тобора оширмоқда. Шунингдек, Ҳиндистон, Гонконг, Россия ва Хитойдан қимматбаҳо тошлар импорти ҳажмининг ортиши юқори малакали геммологик экспертиза хизматларига бўлган талабни кучайтирмоқда.

Журналнинг ёзишича, мамлакатнинг инвестициявий жозибадорлиги ортиб бораётганини Тошкентда ўтказилган V халқаро инвестиция форуми ҳам яққол намоён этган. Форумда умумий қиймати 43,1 миллиард АҚШ долларлик инвестиция келишувлари имзоланган.

Шунингдек, мақолада Ўзбекистон, Афғонистон ва Туркманистон ҳамкорлигида қўшма эркин иқтисодий зона ташкил этиш ташаббуси тилга олиниб, уни амалга оширишда замонавий технологиялар, хусусан, Исроилнинг илғор тажрибаси ва инновацион ечимлари муҳим аҳамият касб этиши таъкидланган.