ВАШИНГТОН, 2 июль. /“Дунё” АА/. АҚШнинг нуфузли “Politico” нашрида Ўзбекистоннинг футбол бўйича жаҳон чемпионатидаги иштироки ҳамда мамлакатдаги мавжуд муҳим минералларга бағишланган мақола эълон қилинди, деб хабар бермоқда “Дунё” АА мухбири.

Материалда ёзилишича, Ўзбекистоннинг жаҳон чемпионатидаги иштироки мамлакатнинг халқаро майдондаги нуфузи тобора ортиб бораётганининг ёрқин ифодаси бўлди. Муаллифлар ушбу воқеани нафақат спорт, балки мамлакатнинг иқтисодий ва геосиёсий аҳамиятига бўлган қизиқишнинг ортиши билан ҳам боғламоқда.

Мақолада қайд этилишича, бугунги кунда Ўзбекистон муҳим минераллар захиралари бўйича дунёда катта салоҳиятга эга давлатлардан бири ҳисобланади. Мамлакатда вольфрам, молибден, мис ва бошқа стратегик хомашёларни чуқур қайта ишлаш ҳамда юқори қўшилган қийматли маҳсулотлар ишлаб чиқаришга қаратилган кенг кўламли дастурлар амалга оширилмоқда.

Нашрга кўра, муҳим минералларга бўлган глобал талабнинг ортиши шароитида Ўзбекистоннинг саноатни модернизация қилиш ва халқаро таъминот занжирларидаги ўрнини мустаҳкамлашга қаратилган сиёсати мамлакатнинг инвестициявий жозибадорлигини янада оширмоқда.

“Спортдаги ютуқлар ва иқтисодиётнинг стратегик тармоқларида амалга оширилаётган ислоҳотлар Ўзбекистоннинг халқаро майдондаги мавқеини мустаҳкамлашга хизмат қилмоқда”, деб ёзган “Politico”.