ВАШИНГТОН, 24 август. /“Дунё” АА/. АҚШ Конгресси Вакиллар палатаси аъзоси Брайан Фитцпатрик мамлакатимиз мустақиллигининг 35 йиллиги арафасида “Дунё” АА орқали юртдошларимизга ўзининг самимий табриги ва эзгу тилакларини йўллади.

– Аввало, Ўзбекистон халқини мустақилликнинг 35 йиллиги билан самимий муборакбод этаман.

Мен Пенсильвания штатининг 1-сайлов округидан сайланган конгрессменман. Округимиз таркибига кирувчи Филадельфия шаҳри атрофида ўзбек жамоасининг салмоқли қисми истиқомат қилади. Энг йирик ўзбек диаспора тузилмаларидан бири ҳисобланган “Vatan Alliance Global” билан мустаҳкам алоқа ўрнатганмиз ва ҳамкорлигимиз изчил ривожланмоқда.

Айтиш лозимки, мустақилликка эришиш ҳар бир халқ ҳаётида мураккаб ва муҳим тарихий жараён ҳисобланади. 250 йил муқаддам мустақилликни қўлга киритган АҚШ билан 35 йил аввал истиқлолга эришган Ўзбекистон ўртасида муайян ўхшашлик мавжуд.

Мустақиллик, эркинлик ва ўз тақдирини ўзи белгилаш ҳар бир халқ учун муштарак қадрият ҳисобланади. Истиқлолни ҳар дам асраб-авайлаш, ҳимоя қилиш ва янада мустаҳкамлаш зарур.

Мамлакатларимиз ўртасидаги муносабатлар сўнгги пайтларда янада ривожланди. Мамлакатингизда рўй бераётган ислоҳотларни доимий равишда кузатиб келаман. Ўзбекистонга ташриф буюриб, бу заминда амалга оширилаётган ўзгаришларни бевосита ўз кўзим билан кўриш ниятидаман.

“Vatan Alliance Global” вакиллари менга “Миллат Шавкати” китобини совға қилишди. Ушбу китобда Ўзбекистонда сўнгги йиллардаги кенг кўламли ислоҳотлар, юз берган муҳим ўзгаришлар батафсил баён этилибди.

Яна бир бор Ўзбекистон халқига тинчлик, хотиржамлик, бахт-саодат ва файзу барака тилайман.