ХЕЛЬСИНКИ-ТАЛЛИН, 25 май. /“Дунё” АА/. Тошкент шаҳар ҳокимлиги делегациясининг Финляндия ва Эстония давлатларига хизмат сафари амалга оширилди, деб хабар бермоқда “Дунё” АА мухбири.

Ушбу ташриф юртимизнинг Латвиядаги элчихонаси ҳамда Халқаро Нордик университети кўмагида ташкил этилди. Хельсинки шаҳрида ўтказилган учрашувда делегация аъзолари “Meri” боғчаси ва “Vattuniemi” мактаби мисолида Финляндиянинг инклюзив таълим ҳамда болаларни эрта ривожлантириш тизими билан танишди.

Хельсинки шаҳар ҳокимлиги ва “Edulyzer” ташкилоти вакиллари билан кечган мулоқотларда шаҳар бошқаруви ва сунъий интеллект ёрдамида ўқувчилар психологиясини таҳлил қилиш платформалари ўрганилди.

Делегация аъзолари Хельсинки университети раҳбарияти билан педагоглар малакасини ошириш бўйича келишувларга эришиб, Халқаро Нордик университети ва “HY+” ўртасида ҳамкорлик меморандумини имзолади.

Таллин шаҳрида бўлиб ўтган учрашувда Эстониянинг таълим соҳасини рақамлаштириш ва электрон ҳукумат йўналишидаги истиқболли лойиҳалар кўриб чиқилди. Делегация аъзолари шаҳар ҳукумати, “e-Estonia” брифинг маркази ва Таллин технология университети раҳбарияти билан кўришиб, СИ ва инновацион экотизимларни жорий этиш тажрибасини таҳлил қилиб, “EdTech Testbeds” халқаро анжуманида иштирок этди.

Ташриф якунлари бўйича таълим сифатини ошириш, давлат хизматларини рақамлаштириш ва ижтимоий ҳимоя тизимини такомиллаштириш соҳаларида Финляндия ва Эстониянинг энг илғор моделларини Тошкент шаҳрида босқичма-босқич татбиқ этиш юзасидан муҳим келишувларга эришилди.