РИМ, 25 май. /“Дунё” АА/. Италиянинг “Milano Finanza”, “Agenzia Nova” ва “Euroborsa” нашрлари Ўзбекистон Миллий инвестиция жамғармасининг (UzNIF) Лондон фонд биржасидаги дебюти ҳақида материаллар эълон қилди, деб хабар бермоқда “Дунё” АА мухбири.

Мақолаларда таъкидланишича, UzNIF акциялари Лондон ва Тошкент фонд биржаларида жойлаштирилиши мамлакат тарихидаги энг йирик битим ҳамда илк ҳолати бўлди.

Жойлаштириш нархи “GDR” учун 25 долларни ва акция учун эса 4,65 сўмни ташкил этди. Жалб қилинган маблағларнинг умумий ҳажми қарийб 603,6 миллион долларга етди.

Ташкилотчиларнинг маълумотига кўра, жойлаштирувга бўлган талаб таклифдан анча юқори бўлиб, 2,8 миллиард доллардан ошган, аризалар китоби эса тўрт мартадан кўпроқ қайта имзоланган.

Келишув иштирокчилари орасидан “BlackRock”, “Franklin Resources” ва “Redwheel” каби йирик халқаро инвесторлар ўрин олган.

 UzNIF акциялари савдоси 18 май куни бошланди. Биринчи куннинг ўзидаёқ Лондон биржасида депозит тилхатлари 10 фоизга – 25 доллардан 27,5 долларгача кўтарилди. Кейинчалик қимматли қоғозлар нархи 28,9 долларга етди.

Жамғарма Ўзбекистондаги энергетика, транспорт, телекоммуникация, коммунал ва банк соҳаларида фаолият юритувчи 13 та йирик давлат компаниясидаги улушларни бирлаштирди.