ИСЛОМОБОД, 9 май. /“Дунё” АА/. Покистоннинг “Daily Independent”, “The world News”, “News Network Pakistan”, “Infora News” нашрларида “Милодий II-III асрларга оид ноқонуний олиб кетилган тарихий бойликлар Ўзбекистондаги Ислом цивилизацияси марказига қайтарилди” сарлавҳали мақолалар эълон қилинди, деб хабар бермоқда “Дунё” АА мухбири.

Мақолаларда қайд этилишича, милодий II–III асрларга оид ўғирланган маданий бойликлар Европа мамлакатлари ҳуқуқ-тартибот идоралари ҳамда олимлари иштирокида ўтказилган кенг кўламли текширув натижасида Ўзбекистонга қайтарилган.

Қадимги Бактрия ва Кушон империяларининг маркази бўлган Марказий Осиё минтақасидан ноқонуний олиб чиқилган артефактларнинг бир қисми Буюк Британия пойтахти полициясининг Санъат ва антиквариат соҳасидаги жиноятларга қарши курашиш бўлими томонидан Ўзбекистоннинг Лондондаги элчихонасига топширилди.

Ушбу воқеа Ўзбекистоннинг миллий маданий меросни қайтариш борасидаги изчил сиёсатининг яққол далили бўлиб, бутун дунёда маданий қадриятларни ҳимоя қилиш тенденция кучайиб бораётганини яна бир бор тасдиқлайди.

Мақолаларда Ислом цивилизацияси маркази директори Фирдавс Абдухолиқовнинг фикрлари ҳам келтирилган. Фирдавс Абдухолиқов таъкидлаганидек, мазкур хайрли тадбирлар Президент Шавкат Мирзиёевнинг маданий бойликларни Ватанга қайтаришга қаратилган изчил сиёсати халқаро миқёсда кенг қўллаб-қувватланаётганининг амалий ифодасидир. Шунингдек, бу борада Европа мамлакатлари ҳуқуқ-тартибот идоралари вакилларининг кўмаги алоҳида эътироф этилган.

Лондон полицияси детективи Софи Хейснинг маълум қилишича, 2025 йил ноябрь ойида “Inherent Vice” деб номланган операция давомида аниқланган артефактлар нафақат Ўзбекистон, балки бутун инсониятнинг бебаҳо бойлиги ҳисобланади. Унинг сўзларига кўра, мазкур жараён миллий ва хорижий мутахассислар, EХҲТ ва WOSCU кўмагида амалга оширилган.

Жами тўққизта экспонат, жумладан, ҳайкал бошлари ва гипсли фреска парчалари милодий II–III асрлардан VII асргача бўлган даврга оид бўлиб, муҳим тарихий аҳамиятга эга. Ушбу ноёб осори-атиқаларнинг қайтарилиши нафақат Янги Ўзбекистоннинг муҳим ютуқларидан бири, балки тарихий меросни асраб-авайлаш йўлидаги самарали халқаро ҳамкорлик натижасидир.