ТОШКЕНТ, 28 январь. /“Дунё” АА/. Ўзбекистон элчихонасида Нагоя мэрияси Халқаро ҳамкорлик департаменти директори Макио Ямада билан учрашув бўлиб ўтди, деб хабар бермоқда “Дунё” АА мухбири.

Унда Ўзбекистон ва Япония ўртасидаги ҳудудлараро ҳамкорликни ривожлантириш масалалари муҳокама қилинди.

Япон томони 2025 йилнинг декабрь ойида Ўзбекистон Президентининг Японияга амалга оширилган расмий ташрифини алоҳида таъкидлаб, ушбу тарихий ташриф икки давлат ўртасидаги алоқаларни янада кенгайтириш ҳамда янги салоҳиятли йўналишлардаги ўзаро ҳамкорликни фаоллаштиришга туртки беришини билдирди.

Маккио Ямада Ўзбекистон билан ҳудудлараро алоқаларни ривожлантириш мақсадида Нагоя шаҳри мэри Ичиро Хиросава бошчилигидаги делегациянинг мамлакатимизга ташрифи режалаштирилаётганини маълум қилди. Шунингдек, делегация таркибидан Нагоя шаҳар кенгаши депутатлари ҳам ўрин олиши қайд этилди.

Бўлажак ташриф давомида томонлар Тошкент ва Нагоя шаҳарлари ўртасида ўрнатилган ҳамкорликни янада ривожлантириш масалаларини муҳокама қилиши режалаштирган.