ТОШКЕНТ, 22 июнь. /“Дунё” АА/. Норвегиянинг “Resilienza Holding” компанияси бош директори Дэвид Миланович Тошкент халқаро инвестиция форумида иштирок этиш учун мамлакатимизга келди, деб хабар бермоқда “Дунё” АА мухбири.

Анжуман доирасида норвегиялик бизнесмен Ўзбекистонда хорижий сармоядорлар учун яратилган қулай инвестиция муҳити ва ахборот технологиялари соҳасига қаратилаётган юксак эътиборни юқори баҳолади. Мазкур изчил ислоҳотларнинг амалий натижаси сифатида у ўзининг “Varde Group” IT-компаниясини Жиззахдаги IT-парк резиденти сифатида расман рўйхатдан ўтказди.

Тадбиркорнинг таъкидлашича, Ўзбекистонда IT-секторининг жадал суръатлар билан ривожланаётгани, соҳа вакиллари учун тақдим этилаётган кенг кўламли солиқ ва божхона имтиёзлари ҳамда энг муҳими, ёш ва малакали кадрлар салоҳияти компаниянинг юртимизда ўз фаолиятини бошлашига асосий туртки бўлган.

Дэвид Миланович келгусида мазкур компания орқали Ўзбекистоннинг рақамли салоҳиятидан фойдаланган ҳолда Норвегия ва бошқа Скандинавия мамлакатлари бозорларида йирик IT-лойиҳаларни кенгайтиришни ҳамда рақамли хизматлар экспортини йўлга қўйишни режалаштираётганини маълум қилди.