ИСЛОМОБОД, 21 декабрь. /“Дунё” АА/. Покистоннинг етакчи оммавий ахборот воситалари Ўзбекистон Президентининг Токиода бўлиб ўтган «Марказий Осиё + Япония» мулоқотининг биринчи саммитидаги нутқини ва ташаббусларини кенг ёритди, деб хабар бермоқда “Дунё” АА мухбири.

Жумладан, ушбу мамлакатнинг "Diplomatic News Agency" ахборот агентлиги, "The World News", "New Network Pakistan", "Pakistan In the World", "Global News Pakistan", "Cpec News", "The Diplomatic Insight", "Diplomatic Affairs", "Islamabad Post", электрон ва босма нашрлари  ва "Pakistan Today" газетасида Ўзбекистон Президентининг «МО-Япония» биринчи саммитидаги нутқини тўлиқ эълон қилди ва Давлатимиз Раҳбарининг кунчиқар юрт билан алоқаларни янги босқичга кўтаришга қаратилган таклифларининг мазмун-моҳиятига доир туркум мақолалар эълон қилинди.

 Нашрларда 20 декабрь куни Ўзбекистон Республикаси Президенти Шавкат Мирзиёев Токиода “Марказий Осиё + Япония” мулоқотининг биринчи саммитида иштирок этди ва ўз нутқида “Марказий Осиё + Япония” форматида ҳамкорликни ривожлантириш юзасидан ўз нуқтаи назарини тақдим этди.

«Аввало, саммитларни Давлат Раҳбарлари даражасида ҳар икки йилда бир марта ўтказиш таклиф қилинди. Бу ҳамкорликка қўшимча кучли суръат бағишлашга хизмат қилади. Навбатдаги шундай учрашувлардан бирини Ўзбекистонда қабул қилишга тайёрлик билдирилди. Япониянинг адлия ва ҳуқуқ соҳасида ҳамкорлик бўйича янги доимий механизмини яратиш ва келгуси йили Токиода адлия вазирларининг биринчи учрашувини ташкил этиш борасидаги ташаббуси қўллаб-қувватланди», – дейилади манбаларда.

Ўзбекистон етакчиси Республика «Марказий Осиё – Япония 2040» ҳамкорлик стратегиясини ишлаб чиқиб, ҳужжатга минтақа мамлакатларининг барқарор ривожланишига кўмаклашиш ва уларни глобал иқтисодий жараёнларга чуқур интеграция қилиш бўйича аниқ дастур ва лойиҳаларни киритиш тарафдори эканлигини қайд этди.

Покистон ОАВ, шунингдек, Президент Шавкат Мирзиёев янги ғоя ва таклифларни ишлаб чиқиш, ҳамкорликнинг кенг кўламли кун тартибини шакллантириш учун мамлакатларнинг етакчи таҳлил тузилмалари иштирокида Экспертлар форумини таъсис этиш муҳимлиги таъкидлаганига эътибор қаратган. Қайд этилганидек, форумнинг илк мажлисини келгуси йили Тошкентда ўтказиш таклиф қилинди.

“Ўзбекистон Президенти Япония молия институтларининг Марказий Осиёда савдо-иқтисодий ва инвестиция лойиҳаларини қўллаб-қувватлашни кенгайтиришини олқишлади”, – дея урғуланган мақолаларда.