БЕЛГРАД, 26 октябрь. /“Дунё” АА/. Сербияда талабалар норозилик ҳаракати муддатидан олдинги парламент сайловларида ғалаба қозонгандан сўнг Сербия тараққийпарвар партияси (SNS) етакчиси Александр Вучич ўз сиёсий кучининг мағлубиятини тан олди, деб хабар бермоқда “Дунё” АА мухбири.

“Бизда ҳали якуний натижалар йўқ, бироқ бу сайловларда мағлуб бўлганимиз аниқ”, – дея Александр Вучичнинг сўзларидан иқтибос келтирган “DW News”.

Александр Вучичнинг таъкидлашича, дастлабки ҳисоб-китобларига кўра, “Талабалар рўйхати” парламентдаги 250 ўриндан 135 тадан 140 тагачасини қўлга киритади, SNSга эса 105 та мандат насиб этади.

Марказий сайлов комиссияси маълумотларига кўра, якшанба куни соат 18:00 ҳолатига сайловчилар давомати 64,9 фоизни ташкил этган. Сербия оммавий ахборот воситаларининг таъкидлашича, бу 1992 йилда Югославия парчаланганидан бери қайд этилган рекорд кўрсаткичдир.

SNS етакчисининг баёнотидан сўнг Белград аҳолиси талабалар ҳаракатининг ғалабасини нишонлаш учун кўчаларга чиқди. Тантаналар мамлакат шимолидаги Нови-Сад шаҳрида ҳам бўлиб ўтди. Айнан шу ердаги темир йўл вокзалида юз берган фожиадан сўнг оммавий норозилик намойишлари бошланган эди.

“Талабалар рўйхати” 2024 йил ноябрь ойида Нови-Сад вокзалида бостирма қулаб тушиши оқибатида 16 киши ҳалок бўлганидан кейин кучайган жамоатчилик норозилиги фонида шаклланди. Фожиа коррупция ва ҳукуматнинг масъулиятсизлиги билан боғлиқ айбловларга сабаб бўлди. Ҳаракат амалдаги раҳбарият мухолифларини бирлаштирди ҳамда жамиятнинг турли қатламлари, жумладан, шифокорлар, актёрлар, олимлар ва спортчилар орасидан парламентга номзодлар кўрсатди.

Коррупцияга қарши кураш ва оммавий ахборот воситалари эркинлиги ҳаракатнинг асосий талабларидан бирига айланди.

“Бу эркин давлат бўлади”, – деди “Талабалар рўйхати”нинг етакчи номзоди Илия Срданович мамлакатдаги авторитар тенденцияларга барҳам берилишига умид билдирар экан.

Икки муддат президентлик лавозимида ишлаган ва учинчи муддатга номзодини қўйиш ҳуқуқига эга бўлмаган Александр Вучич 2017 йилда тарк этган бош вазир лавозимига қайтишни мўлжаллаган эди. Сайловолди кампанияси давомида у пенсиялар ва давлат сектори ходимларининг маошларини ошириш, соғлиқни сақлаш соҳасига инвестицияларни кўпайтиришни ваъда қилганди.

У баёнот берган вақтда овоз беришнинг якуний натижалари ҳали эълон қилинмаган эди. У келтирган мандатлар тақсимоти дастлабки тахмин бўлиб қолмоқда, парламентнинг якуний таркиби эса сайлов органлари томонидан тасдиқланиши керак.

“РИА Новости” сурати