ОСТОНА, 8 март. /“Дунё” АА/. Қозоғистоннинг “Ulys Media” ахборот нашрида Ўзбекистоннинг хорижий уран конларини пухта ўрганиш бўйича олиб бораётган ишлар хусусида мақола эълон қилинди, деб хабар қилмоқда “Дунё” АА мухбири.

Мақолада ёзилишича, Ўзбекистон Мўғулистоннинг истиқболли уран конларини геологик ўрганиши қайд этилган.

Бу борада шу йил апрель ойида ўтказилиши режалаштирилган ҳукуматлараро йиғилиш доирасида икки мамлакат тоғ-кон саноати ва геология вазирликлари ҳамда ташкилотлари ўртасида стратегик битим имзоланиши кўзда тутилган.

Томонлар истиқболли уран конлари бўйича геологик ва экологик лойиҳа ҳужжатларини ишлаб чиқиб, лицензия олиш учун зарур ҳужжатларни Мўғулистон ваколатли органига тақдим этади. Биринчи босқичда захираларни баҳолаш ва кейинги ишларни аниқлаштириш учун 60 минг погон метрга яқин майдонни бурғилаш режалаштирилган.

Ўзбекистоннинг ўзида шу йилнинг ўзидаёқ тўртта уран конини ўзлаштириш бошланади. Гап “Арнасой” (Жиззах вилояти), “Ғарбий Қизилкўк”, “Жанубий Жонгелди” (Навоий вилояти) ва “Шарқий Агрон” (Самарқанд вилояти) ҳақида бормоқда. Ўтган йили Ўзбекистонда 139 минг тонна аниқланган захиралар билан 7 минг тонна уран қазиб олинган.