АНҚАРА, 13 февраль. /“Дунё” АА/. Туркиядаги олий таълим муассасаларида таҳсил олаётган ўзбекистонлик талабалар Туркия Буюк Миллат Мажлиси (Парламент)га ташриф буюрди, деб хабар қилмоқда “Дунё” АА мухбири.

Ушбу экскурсия хорижда таҳсил олаётган ўзбекистонлик талаба-ёшларнинг жамоатчиликда фаоллигини ошириш, уларнинг бўш вақтларини мазмунли ўтказишини таъминлаш мақсадида ташкил этилди.

Туркия Буюк Миллат Мажлиси (ТБММ) 1920 йилда Усмонийлар Империясининг Иттифоқчи давлатлар томонидан босиб олингани ва натижада Мажлиси Мабусон (Усмоний депутатлар мажлиси)нинг ёпилишига қаршилик кўрсатиш мақсадида ташкил этилган.

Ташрифдан кўзланган мақсад – турк олий таълим муассасаларида сиёсат, ҳуқуқшунослик ва жамиятшунослик каби соҳаларда таҳсил олаётган ўзбекистонлик талабаларни Туркиянинг энг нуфузли идораларидан бири саналган ТБММ тарихи ва унинг фаолияти билан яқиндан таништиришдир.

Талабалар ушбу ташкилотда Туркияда қонун ишлаб чиқариш тамойиллари, халқаро шартномаларнинг ратификация қилиниши, ижтимоий, сиёсий ва иқтисодий қарорларнинг қабул қилиниши, ҳарбий ва фавқулодда ҳолат эълон қилиш ҳақида кўникмаларига эга бўлди. Шу билан бирга, Туркия қонунчилигининг ишлаб чиқилиши, депутатларнинг қай тартибда сайланиши ҳамда уларнинг парламентдаги ўрни ҳақида маълумотлар билан танишди.

“Суверенитет сўзсиз ва шартсиз миллатникидир!” Туркия Республикасининг биринчи президенти Мустафо Камол Отатуркнинг мазкур тарихий сўзлари билан безатилган ва шоҳсупадан жой олган депутатларнинг Умумий Йиғилиш залида талабаларга парламент маъмурияти томонидан йиғилишларнинг ўтказилиш схемасига оид тақдимот намойиш қилинди. Талабаларни қизиқтирган саволларга батафсил жавоб берилди.

Ташрифнинг иккинчи қисмида Парламент ички биносига экскурсия ташкил этилди. Экскурсия давомида, талабалар ҳозирги кунда ҳукумат иқтидорини ўз кўлида ушлаб турган ҳамда бош мухолифат ва кичик партия фракцияси вакилларининг ишлаш тартибларига оид кўникмаларга эга бўлди.

Туркиянинг асосий тамойилларидан бири давлат ҳокимияти тўлиқ халққа тегишли эканида. Буни парламент биносига ташриф буюрган маҳаллий халқнинг кўплиги ва фуқароларнинг Парламент ичида эркин ҳаракатлана олишлари учун алоҳида махсус ҳудудларнинг ташкил этилганида намоён бўлган дейиш мумкин. 

2016 йил 15 июль санасида Туркияда содир бўлган давлат тўнтариши оқибатида зарар кўрган Парламент биноси қисмлари қайта таъмир қилинмасдан ўз ҳолича қолдирилгани талабаларнинг эътиборини тортди.

Ушбу давлат тўнтариши вақтида Парламент биносига қирувчи F-16 самолётлари орқали отилган 3 дона снаряд келиб урилган.

Парламент маъмуриятининг таклифига биноан талафот кўрган жойлар тарих ёддан чиқармаслик ва турк халқи қаҳрамонлигининг рамзий ишораси сифатида ўзгартиришларсиз қолдирилган.

Ташриф “Ўзбекистон ва Туркия Парламентлараро дўстлик гуруҳи” маслаҳатчилари билан танишиш, гуруҳ фаолияти ҳақида маълумот олиш билан бойитилди. Талабаларимизнинг таклифига биноан, парламент вакиллари билан яқиндан алоқа ўрнатиш, уларнинг Анқарада талабаларимиз томонидан ташкил этилиб келинаётган “Ўзбекистон миллий кунлари” каби тадбирларда иштирок этиши таклиф этилди.

Ташриф якунида, Ўзбекистон–Туркия муносабатлари ҳақида мушоҳада қилиниб, Президент Шавкат Мирзиёевнинг 29 январь санасидаги Туркияга амалий ташрифи ва кун тартибига олинган мавзулар, мамлакатларимиз ўртасидаги имзоланган ҳукуматлараро битимлар юзасидан фикр алмашилди.