ЛОНДОН, 3 май. /“Дунё” АА/. Буюк Британия фуқаролари – марҳум Жон ва Филлис Эмили Ле Бретонлар Иккинчи жаҳон урушида кўрсатган жасорати ва инсонпарварлик ҳаракатлари учун “Дўстлик” ордени билан тақдирлади, деб хабар бермоқда “Дунё” АА мухбири Британиянинг “London Post” порталига таяниб.

Президент фармонига кўра, эр-хотин Иккинчи жаҳон уруши даврида, ғоят таҳликали вазиятда, ўз ҳаётларини жиддий хавф-хатарга қўйиб бўлса-да, Жерси оролидаги фашистлар концлагеридан қочиб чиқишга муваффақ бўлган ўзбекистонлик аскар Боқижон Акрамовга ўз уйларидан жой бериб, унинг жонини асраб қолганлари учун тақдирланган. Ўз ҳаёти учун жиддий хавфга қарамай, Ле Бретонлар аскарни ўз уйларида яшириб, асирликдан ҳимоя қилган.

Фармонда эр-хотиннинг “буюк жасорати ва инсонпарварлик фазилатлари” юқори баҳоланиб, уларнинг иши дунё халқлари ўртасида тинчлик, дўстлик ва биродарлик ғояларини тарғиб этишда намуна экани таъкидланган. Уларнинг халқаро ҳамжиҳатлик ва бирдамликни мустаҳкамлашга қўшаётган беғараз ҳиссаси эътироф этилмоқда.

“Дўстлик” ордени Ўзбекистоннинг олий давлат мукофотларидан бири бўлиб, одатда икки томонлама муносабатларни ривожлантириш, тинчликни мустаҳкамлаш ва гуманитар қадриятларни тарғиб қилишга қўшган ҳиссаси учун хорижий фуқароларга берилади.

Баён этилган воқеалардан саксон йилдан кўпроқ вақт ўтгач, ўлимидан кейинги мукофот ўзбек халқининг Ле Бретон оиласининг жасорати ва маънавий матонатига бўлган ҳурматининг белгиси бўлди. У тарихнинг энг оғир даврларидан бирида Ўзбекистон ва Буюк Британия фуқароларини бирлаштирган ҳамдардлик ҳаракатини абадийлаштиради.

Расмий тақдирлаш маросими белгиланган тартибда ўтказилиши ва Ле Бретон оиласи вакиллари ушбу мукофотни олиши режалаштирилган.

Аввалроқ Британия оммавий ахборот воситаларида Боқижон Акрамов украиналик экани маълум қилинганди, бироқ кейинги суриштирувлар унинг Ўзбекистон фуқароси эканини тасдиқлади.