ИСЛОМОБОД, 3 май /“Дунё” АА/. Ўзбекистон элчихонаси дипломатлари кўмагида хорижда оғир ҳаётий вазиятга тушиб қолган ҳамюртимиз С.Ж. Покистондан ватанига қайтарилди, деб хабар бермоқда “Дунё” АА мухбири.

Элчихона маълумотларига кўра, шу йил февраль ойида С.Ж. Ўзбекистонга қайтишда ёрдам сўраб дипломатик ваколатхонага мурожаат қилган. Суҳбат давомида аниқланишича, у 2005 йилдан буён Покистон ҳудудида визасиз ноқонуний яшаб келган ва оғир ижтимоий аҳволга тушиб қолган.

Ватандошимизнинг сўзларига кўра, у 2005 йилда Покистон фуқароси билан турмуш қуриш мақсадида ушбу мамлакатга келган. Шу йилнинг ўзида турмуш ўртоғи йўл-транспорт ҳодисасига учраб, ногирон бўлиб қолган. Шундан буён ҳамюртимиз турмуш ўртоғини парваришлаб келмоқда. Ҳозирги кунда турмуш ўртоғининг саломатлиги нисбатан яхшиланган бўлса-да, ногиронлик ҳолати қисман сақланиб қолган. Шунингдек, оиланинг ижтимоий ва молиявий аҳволи ҳамон оғирлигича қолмоқда.

Ўрганишлар давомида юртдошимизнинг ҳақиқатда ҳам молиявий имкониятлари чеклангани, у фақат кундалик рўзғор харажатларини қоплаш имкониятига эга экани маълум бўлди.

Шу муносабат билан элчихона унинг шахси ва фуқаролигини тасдиқлади. Шундан сўнг, Ўзбекистонга қайтиш учун сертификат расмийлаштирилди. Покистон Ички ишлар вазирлиги мутасаддилари билан олиб борилган музокаралар натижасида юртдошимизнинг 21 йил давомида визасиз ноқонуний яшагани учун белгиланган 8400 АҚШ доллари миқдоридаги жарима бекор қилинди ва унга мамлакатни тарк этиш учун рухсат олинди.

Бундан ташқари, дипломатик миссия кўмагида С.Ж. учун Ўзбекистонга авиачипта сотиб олинган. Ҳамюртимиз шу йил 2 май куни “Uzbekistan Airways” авиакомпаниясининг “Исломобод–Тошкент” йўналиши бўйича ватанга қайтарилган.