ПЕКИН, 25 сентябрь. /“Дунё” АА/. Пекинда Ўзбекистон ва Хитой халқлари ўртасида маданий яқинлашув ва дўстликни ривожлантиришга бағишланган “Ипак йўли ёшлари: Ўзбекистон” ҳужжатли фильмининг премьераси бўлиб ўтди, деб хабар бермоқда “Дунё” АА мухбири.

Фильм Ўзбекистоннинг Пекиндаги элчихонаси кўмагида Хитой халқаро коммуникациялар гуруҳи (CICG)нинг “Dolphin Books” нашриёти билан ҳамкорликда яратилди.

Премьерада CICG, Хитой энергетика муҳандислик корпорацияси (CEEC), Ўзбекистон Миллий медиа ассоциацияси, Ўзбекистон элчихонаси ва оммавий ахборот воситалари вакиллари иштирок этди.

Учрашувда Ўзбекистон ва Хитой қадимдан Ипак йўлидаги муҳим шериклар экани, ўзаро муносабатларни янада ривожлантиришда ёшлар муҳим ўрин тутиши таъкидланди.

Икки томонлама муносабатларни мустаҳкамлашда оммавий ахборот воситаларининг ролига алоҳида эътибор қаратилди. Фильм премьераси Ўзбекистон ва Хитой ўртасидаги дўстлик ва ҳар томонлама стратегик шерикликнинг яна бир далили сифатида баҳоланди.

Ҳужжатли фильмда икки давлат ўртасидаги муносабатлар ёшлар ҳикоялари орқали ёритилган. Шу билан бирга, фильмда ёшларнинг кундалик ҳаёти, шерикликдаги меҳнати ва ўз мақсадларини амалга оширишга интилишлари кўрсатилган.

“Ипак йўли ёшлари: Ўзбекистон” ҳужжатли фильми икки қисмдан иборат. “Нурга йўл” деб номланган биринчи қисм Хитой энергетика муҳандислик корпорациясининг Ўзбекистондаги янги лойиҳалари, хитойлик ёш муҳандислар ва CEECнинг ўзбекистонлик ходимлари фаолиятига бағишланган.

“Орзулар қайтадиган жой” номли иккинчи қисмда Хитойда таҳсил олаётган ва тадбиркорлик фаолиятини бошлаётган ўзбекистонлик талабалар, уларнинг ўз режа ва орзуларини амалга оширишга бўлган интилишлари ҳақида ҳикоя қилинади.

Шунингдек, фильмда икки мамлакат ўртасидаги маданий алмашинув, савдо-иқтисодий ва сармоявий ҳамкорликка алоҳида эътибор қаратилган.

Расмий премьерадан сўнг ҳужжатли фильм Ўзбекистон ва Хитой телеканаллари ҳамда ижтимоий тармоқларда намойиш этилиши маълум қилинди.