ТОКИО, 16 октябрь. /“Дунё” АА/. Ўзбекистоннинг Япониядаги элчихонасида “Noritsuisu Co. Ltd.” компанияси президенти Шого Аоки билан учрашув ўтказилди, деб хабар бермоқда “Дунё” АА мухбири.

Мулоқот чоғида мамлакатимизда янги инвестиция лойиҳаларини амалга ошириш масалалари муҳокама қилинди. Япон томони Ўзбекистонда бизнес юритиш ва хорижий инвестицияларни жалб этиш учун яратилган қулай шароитларни юқори баҳолаб, амалга оширилаётган ислоҳотлар, тадбиркорликни қўллаб-қувватлаш чора-тадбирлари ва қўшма лойиҳаларни рўёбга чиқариш учун кенгаяётган имкониятларни алоҳида таъкидлади.

Томонлар инвестициявий ҳамкорликни кенгайтириш истиқболларини, жумладан, Тошкент вилоятида янги ишлаб чиқариш ташаббусларини рўёбга чиқариш, қўшимча инвестицияларни жалб этиш ҳамда ўзбек маҳсулотларининг Япония бозоридаги экспорт салоҳиятини ривожлантириш масалаларини кўриб чиқдилар.

Бундан ташқари, япон бизнесининг “Янги Тошкент” инфратузилмасини ривожлантиришдаги иштироки, жумладан, турар жой ва меҳмонхона мажмуаларини қуриш, шунингдек, япон тажрибаси ва сифат стандартларидан фойдаланган ҳолда замонавий савдо, ресторан ва сервис объектларини барпо этиш имкониятлари муҳокама қилинди.

Учрашув якунида ўзбек-япон иқтисодий ҳамкорлигини янада кенгайтириш, ишбилармонлик алоқаларини фаоллаштириш бўйича келишиб олинди.