САМАРҚАНД, 20 апрель. /“Дунё” АА/. Бугун Самарқанд шаҳрида “Жамоат саломатлиги ва хавфсизлигини таъминлаш мақсадида трансмиллий наркотаҳдидларга қарши курашиш” мавзусидаги халқаро форум ўз ишини бошлади, деб хабар бермоқда “Дунё” АА мухбири.

​Ўзбекистон Президенти Администрацияси ҳузуридаги наркотиклар ва ўқотар қуролларни назорат қилиш агентлиги ҳамда БМТнинг Наркотиклар ва жиноятчилик бўйича бошқармаси (UNODC) ҳамкорлигида ташкил этилган ушбу нуфузли тадбирда 20 дан ортиқ халқаро ташкилотлар, жумладан, БМТ, ЕИ, ШҲТ, МДҲ ва ЖССТ вакиллари иштирок этмоқда.

Форумда 50 га яқин давлатдан ҳуқуқни муҳофаза қилувчи органлар раҳбарлари ва 500 нафарга яқин халқаро экспертлар жам бўлган.

​Тадбир юқори даражадаги кўргазма билан бошланди. Пленар мажлисда БМТ Наркотиклар ва жиноятчилик бўйича бошқармаси оператив бўлими директори Бо Матиасен қутлов сўзи билан чиқиш қилди.

Тадбир давомида Ўзбекистон Наркотикларни назорат қилиш агентлиги, Халқаро ва Иберо-Америка бошқарув ҳамда давлат сиёсати жамғармаси (FIIAPP) ўртасида ўзаро англашув меморандуми имзоланиши режалаштирилган.