ВЭНЬЧЖОУ, 20 апрель. /“Дунё” АА/. Ўзбекистон дипломатларининг Хийтойнинг Чжэцзянь провинцияси Вэньчжоу шаҳрига хизмат сафари амалга оширилди, деб хабар бермоқда “Дунё” АА мухбири.

Мазкур ташриф Вэньчжоу шаҳри Ташқи ишлар канцелярияси таклифи билан ташкил этилди.

Сафар доирасида Вэньчжоу шаҳар мэри Чжан Веньцзе билан учрашув бўлиб ўтди. Учрашувда Ўзбекистонда амалга оширилаётган ислоҳотлар, мамлакатлар ўртасидаги ҳамкорлик алоқалари хусусида сўз юритилди.

Ўзбекистон ва ХХР давлат раҳбарлари ўртасидаги дўстона муносабатлар яқин ҳамкорлик учун янада қулай шароит яратаётгани, 2025 йил якунларига кўра, икки давлат ўртасида товар айирбошлаш ҳажми 17,8 миллион долларга етгани таъкидланди.

Шунингдек, “Wenzhou Garden Expo Park”да 15-халқаро боғлар кўргазмасининг очилиш маросими бўлиб ўтди. Унда Чжэцзян провинцияси ва Вэнчжоу шаҳри раҳбарлари, дипломатлар ва халқаро ташкилотлар вакиллари иштирок этди.

Ушбу паркда Хитой шаҳарлари номлари билан аталган боғлардан ташқари Ўзбекистон, АҚШ, Канада, Италия, Нидерландия, Таиланд, Япония, Франция, Буюк Британия, Ипак йўли ҳамкорлик денгиз боғлари ва IFLA ташкилотининг павильонлари барпо этилган бўлиб, улар доимий равишда фаолият кўрсатиб келади.

Куннинг иккинчи ярмида Вэньчжоу шаҳар Халқаро савдони ривожлантириш кенгаши томонидан иқтисодий ва савдо конференцияси ўтказилди. Унда 50 дан ортиқ йирик маҳаллий компания, Ўзбекистон, Қатар ва Беларусь консулхоналари ҳамда бошқа халқаро ташкилотлар вакиллари қатнашди.

Тадбир давомида “Kangnai Group”, “Fapai Group” ва “Chaoda Valves Group” компаниялари ҳамда Вэньчжоу Иқтисодий ва ахборот бюроси раҳбарияти билан Ўзбекистонда инвестиция ҳамкорлигини йўлга қўйиш бўйича дастлабки музокаралар ўтказилди.

Вэньчжоу шаҳар Халқаро савдони ривожлантириш кенгаши раиси Зенг Вей билан икки томонлама ҳамкорликни ривожлантириш масалалари муҳокама қилинди. Учрашув якунида Вэньчжоу компанияларининг Ўзбекистондаги инвестиция лойиҳаларида иштирокини кенгайтириш бўйича келишувга эришилди.