ТОШКЕНТ, 22 январь. /“Дунё” АА/. 19-20 январь кунлари Жаҳон иқтисодиёти ва дипломатия университетида Ўзбекистоннинг хориждаги дипломатик ваколатхоналари раҳбарлари учун икки кунлик ўқув семинари ташкил этилди, деб хабар бермоқда “Дунё” АА мухбири.

Тадбир дипломатларнинг касбий малакасини ошириш, шунингдек, замонавий ташқи сиёсат, халқаро муносабатлар ва парламент дипломатиясининг долзарб масалаларини муҳокама қилишга қаратилди.

Семинарда элчи, сиёсий фанлар доктори, профессор Алишер Файзуллаев “Замонавий дипломатик музокаралар” мавзусида маъруза қилиб, халқаро тизим трансформацияси шароитида дипломатик музокаралар олиб боришнинг асосий ёндашувлари ва амалий жиҳатларини ёритиб берди.

Сўнгра иқтисод фанлари доктори, профессор Нишанбай Сирожиддинов “Ўзбекистон замонавий глобал ва минтақавий интеграция жараёнларида” мавзусидаги маърузасини тақдим этди. У ўз нутқида иқтисодий дипломатия ва мамлакатнинг халқаро интеграция форматларидаги иштирокига алоҳида эътибор қаратди.

Семинарнинг иккинчи кунидаги дастур ташқи сиёсатнинг таҳлилий ва стратегик масалаларига бағишланди. Сиёсатшунослик кафедраси доценти Рустам Маҳмудов “Замонавий халқаро муносабатларни стратегик таҳлил қилиш методологияси” мавзусида маъруза ўқиди. Унда стратегик фикрлаш ва халқаро жараёнларни башорат қилиш усуллари батафсил кўриб чиқилди.

“Эл-юрт умиди” жамғармаси ижрочи директори, профессор Гулноза Исмоилова жамғарманинг халқаро ҳамкорлик истиқболлари мавзусини тақдим этиб, унинг юқори малакали кадрлар тайёрлаш ва инсон капиталини ривожлантиришдаги аҳамиятини алоҳида таъкидлади.

Дастурда Ўзбекистон Сенати раисининг биринчи ўринбосари, Жаҳон иқтисодиёти ва дипломатия университети ректори Содиқ Сафоевнинг маърузалари муҳим ўрин эгаллади. У ўз нутқида Президенти Шавкат Мирзиёевнинг Олий Мажлис ва Ўзбекистон халқига Мурожаатномасига батафсил тўхталиб ўтди, шунингдек, мамлакатимиз ташқи сиёсатининг устувор йўналишларини атрофлича ёритиб берди. Алоҳида маъруза замонавий халқаро муносабатларда парламент дипломатиясининг ўрни ва ўзига хос хусусиятларига бағишланди.

Мазкур семинар профессионал фикр алмашиш, дипломатик корпуснинг таҳлилий кўникмаларини мустаҳкамлаш ва Ўзбекистоннинг ташқи сиёсат соҳасидаги устувор йўналишларини амалга ошириш бўйича ягона ёндашувларни ишлаб чиқиш учун муҳим майдонга айланди.