МОСКВА, 17 сентябрь. /“Дунё” АА/. Россия Фанлар академияси Хитой ва замонавий Осиё институти Марказий Осиё тадқиқотлари маркази раҳбари, сиёсатшунослик фанлари номзоди Александра Перминова “Дунё” ААга Ўзбекистон Президентининг

13–16 сентябрь кунлари Жанубий Кореяга амалга оширган давлат ташрифи ҳақида ўз фикр-мулоҳазаларини билдирди:

– Ўзбекистон Президенти Шавкат Мирзиёевнинг Корея Республикасига давлат ташрифи Тошкентнинг технологик ва сармоявий ҳамкорлик доирасини кенгайтираётганидан далолат бермоқда.

Ўзбекистонда бугунги кунда Жанубий Корея капитали иштирокидаги 700 тадан ортиқ корхона фаолият юритмоқда. Шу маънода айтиш мумкинки, Сеулга ташриф саноатни модернизация қилиш учун янги технология, ускуна ва сармоялар жалб этиш имконини беради. Ташриф арафасида қарийб 12 миллиард долларлик лойиҳалар тўплами тайёрланди.

Жанубий Корея бозори учун Ўзбекистон ичида ишлаб чиқаришни йўлга қўядиган лойиҳалар катта қизиқиш уйғотади. Маҳаллийлаштириш, хомашёни қайта ишлаш, қўшма корхоналар ва машинасозликни ривожлантириш мамлакатнинг ўз саноат базасини мустаҳкамлайди ва унинг барча анъанавий иқтисодий ҳамкорлари билан кооперация имкониятларини кенгайтиради.

Худди шу ҳолат транспорт йўналишига ҳам тегишли. Янги йўналишлар Марказий Осиёнинг умумий боғлиқлигини ошириб, мавжуд транспорт тармоғи билан туташгандагина минтақа учун фойдали бўлади.

Умуман олганда, Жанубий Кореяга амалга оширилган давлат ташрифи Ўзбекистон ва бутун Марказий Осиё минтақаси учун янги имкониятлар очади.