ЭДИНБУРГ, 1 апрель. /“Дунё” АА/. Ўзбекистон Ветеринария ва чорвачиликни ривожлантириш қўмитаси, “Микрокредитбанк” АТБ ҳамда “Паррандасаноат” уюшмаси вакилларидан иборат делегация Шотландиянинг Эдинбург шаҳридаги “Aviagen” паррандачилик марказида бўлди, деб хабар бермоқда “Дунё” АА мухбири.

Ташриф доирасида делегация аъзолари компаниянинг наслли паррандачилик соҳасидаги фаолияти билан яқиндан танишиб, тажриба алмашиш ва ўзаро ҳамкорликни кенгайтириш масалалари бўйича музокара ўтказди.

Хусусан, Ўзбекистон вакиллари “Aviagen” компаниясининг парранда генетикаси бўйича олиб бораётган ишлари, лаборатория фаолияти, парранда зотларини яратиш ва генетик жараёнларни ташкил этиш тажрибасини ўрганди.

Томонлар ҳамкорликка доир янги лойиҳалар бўйича фикр алмашди. Унга кўра, жорий йилнинг май–июнь ойларида Жиззах вилоятининг Зомин туманида компаниянинг наслчилик хўжалиги қурилиши бўйича фикр алмашди. Таъкидланишича, мазкур хўжалик 2027 йил июнь ойида ишга тушириш режалаштирилган.

Мутахассисларнинг таъкидлашича, Эдинбургдаги марказда соғлом ва наслли товуқ зотларини яратиш мақсадида турли лойиҳалар амалга оширилиб келинмоқда.

“Aviagen” компанияси саноат паррандачилиги генетикаси соҳасида дунёдаги етакчи ишлаб чиқувчилардан бири бўлиб, бройлер товуқларни етиштиришга ихтисослашган. Ҳозирда компаниянинг “Ross”, “Arbor Acres” ва “Indian River” каби бройлер товуқлари дунёнинг 130 дан ортиқ давлатида кенг тарқалган.