БУДАПЕШТ, 29 март. /“Дунё” АА/. Мамлакатимизнинг Венгриядаги элчихонаси дипломатлари ушбу давлат билан академик ва инновацион ҳамкорликни ривожлантириш мақсадида Обуда университети проректори Питер Галамбош ва ректор вакили Антал Немет билан музокара ўтказди, деб хабар бермоқда “Дунё” АА мухбири.

Тадбирда Ўзбекистон Олий таълим, фан ва инновациялар вазирлиги, Жиззах вилояти ҳокимлиги, университетлар, саноат компаниялари, стартаплар ва икки мамлакат ишбилармон доиралар вакиллари иштирок этди.

Музокаралар давомида Жиззахда Ўзбекистон–Венгрия илмий-инновацион технопаркининг расмий очилиши эълон қилинди.

Ушбу технопарк олий таълим ва фан соҳасида ҳамкорликни кучайтириш, илмий тадқиқотларнинг амалиётдаги самарадорлигини ошириш, ҳамкор университетлар ва саноат ўртасида алоқаларни ривожлантиришга қаратилган. У олимлар, муҳандислар, тадбиркорлар ва инвесторлар учун платформани таъминлаб, илмий ғояларни бозор ечимларига айлантириш имконини беради.

Венгрия вакили технопаркда ўзбекистонлик ҳамкорлар фаол иштирок этиши мумкинлигини таъкидлади. Ҳамкорликка инновацион лойиҳаларга сармоя киритиш, академик тажриба алмашиш, малакали кадрларни тайёрлаш ва илмий-технологик ҳамкорликнинг бошқа шакллари кириши мумкин. Венгрия университетлари Ўзбекистон олий таълим муассасалари билан талабалар алмашинуви ва қўшма илмий лойиҳаларни кенгайтиришга қизиқиш билдирди.

Жиззахдаги илмий-инновацион технопарк очилиши Ўзбекистон ва Венгрия ўртасида таълим, фан ва инновациялар соҳасидаги стратегик шериклик рамзи бўлиб, икки мамлакатнинг келажак авлодлар фаровонлиги учун билим ва технология алоқаларини ривожлантиришга интилишини кўрсатади.