ВЕНА, 24 апрель. /“Дунё” АА/. Австрия пойтахтида ЕХҲТ томонидан Одам савдосига қарши Алянснинг 26-конференцияси ташкил этилди, деб хабар бермоқда “Дунё” АА мухбири.

Ёшларни жиноятчиликка мажбуран жалб қилишга қарши курашишга бағишланган ушбу конференцияда Ўзбекистон Олий Мажлисининг Бола ҳуқуқлари бўйича вакили Сурайё Рашидова ҳам иштирок этди.

ЕХҲТга аъзо 57 та давлат вакиллари, халқаро ташкилотлар ва фуқаролик жамияти экспертларини бирлаштирган анжуманда глобал хавфсизликка таҳдид солаётган жиноий тармоқлар фаолияти алоҳида таҳлил қилинди.

Экспертлар заиф ҳолатдаги шахслар, айниқса, болаларнинг жиноий гуруҳлар томонидан мажбурлаб жалб этилиши ва бунинг натижасида улар жабрланувчи сифатида эмас, балки жиноятчи сифатида баҳоланаётганини танқид остига олди.

Конференцияда Болалар омбудсмани Сурайё Рахмонова сўзга чиқиб, Ўзбекистонда болаларни жиноий фаолиятга жалб этишнинг олдини олиш бўйича амалга оширилаётган қатъий чоралар ҳақида маълумот берди.

Хусусан, мамлакатимизда қабул қилинган гиёҳвандлик ва наркожиноятларга қарши курашиш бўйича Миллий стратегия доирасида вояга етмаганларни наркожиноятларга ундаш оғир жиноят сифатида эътироф этилгани ва болаларга нисбатан жинсий жиноятлар учун жазо чоралари кучайтирилгани алоҳида таъкидланди.

Анжуман иштирокчилари ўз ихтиёрига қарши жиноятга жалб этилган шахсларга нисбатан “жазоламаслик принципи”ни қўллаш, уларни эрта аниқлаш ва тизимли равишда ижтимоий интеграция қилиш масалаларида ўзаро тажриба алмашди.

10 йилдан буён анъанавий тарзда ўтказиб келинаётган ушбу конференция янги глобал хавф-хатарларга қарши инновацион ва таъсирчан механизмларни ишлаб чиқиш ҳамда давлатлараро ҳамкорликни мустаҳкамлашда муҳим платформа бўлиб хизмат қилмоқда.