ВАРШАВА, 21 июль. /“Дунё” АА/. Ўзбекистон элчихонаси вакиллари хорижда қийин аҳволга тушиб қолган юртдошларимизни ҳар томонлама ҳимоя қилиш ва уларга зарур ёрдам кўрсатиш борасидаги тизимли фаолиятини давом эттирмоқда, деб хабар бермоқда “Дунё” АА мухбири.

Хусусан, дипломатик ваколатхона дипломатлари “Артур Грабовски” адвокатлик бюроси ҳамда Польша Чегара хизмати билан ҳамкорликда олиб борилган музокаралар натижасида наманганлик ватандош И.М. муддатидан олдин шартли равишда озод қилинди.

Ҳамюртимиз Польшада ўлим билан якунланган йўл-транспорт ҳодисасини содир этгани учун мазкур мамлакат Жиноят кодексининг тегишли моддасига асосан судланиб, 3 йил муддатга озодликдан маҳрум этилган эди.

Элчихона томонидан кўрилган тезкор чора-тадбирлар ҳамда Европа Иттифоқининг Чегара ва соҳил хавфсизлиги агентлиги (Frontex) кўмагида юртдошимиз учун “Варшава–Тошкент” йўналиши бўйича авиачипта харид қилинди.

Зарур расмийлаштирув ва кузатув ишлари якунига етказилгач, Ўзбекистон фуқаросининг Польшадан чиқиб кетиши ташкил этилди ва у соғ-саломат Ватанга қайтарилди.