ВАРШАВА, 26 ноябрь. /"Дунё" АА/. Мамлакатимизнинг Польшадаги элчихонасида "Green Crops" компанияси директори Кшиштоф Ружиский билан учрашув бўлиб ўтди, деб хабар қилмоқда "Дунё" АА мухбири.

Мулоқот давомида Кшиштоф Ружиский шу йилнинг 24–29 ноябрь кунлари Тошкентда бўлиб ўтадиган "Agro Expo Uzbekistan" халқаро қишлоқ хўжалиги кўргазмасида иштирок этиш мақсадида Ўзбекистонга ташриф буюриши қайд этилди.

Ташриф доирасида Ўзбекистонда сув тежовчи технологияларни жорий этиш, яшил сабзавот етиштириш бўйича қўшма инвестиция лойиҳалари ҳамда тегишли мутахассислар учун Польша ва Италияда амалий тренинглар ўтказиш бўйича грант лойиҳасини муҳокама этиш режалаштирилган.

Музокаралар якунида Кшиштоф Ружискийга "AgriCool" грант лойиҳаси доирасида 2025 йил май–октябрь ойларида Ўзбекистоннинг аграр соҳага ихтисослашган 3 та олий таълим муассасаларининг 120 нафар талабасига "Green Crops" ва Краков қишлоқ хўжалиги университетида ҳақ тўланадиган ўқув-амалий стажировкаларни ташкил этишда кўрсатилган кўмак учун дипломатик ваколатхона раҳбарининг ташаккурномаси топширилди.

Шунингдек, элчихонамиз дипломатлари ва "Green Crops" компанияси раҳбарияти ўртасида ўзаро манфаатли ҳамкорликни янада ривожлантириш бўйича битим имзоланди.