ТОШКЕНТ, 18 ноябрь. /"Дунё" АА/. "InnoWeek.uz-2024" халқаро инновацион ғоялар ҳафталиги доирасида Ўзбекистон–Эрон инновацион технологиялар бизнес-форуми бўлиб ўтди, деб хабар қилмоқда "Дунё" АА мухбири.

Мазкур бизнес-форум Ўзбекистон Олий таълим, фан ва инновациялар вазирлиги, Инновацион ривожланиш агентлиги, Савдо-саноат палатаси, Эроннинг Илм-фан, технологиялар ва билимга асосланган иқтисодиёт бўйича вице-президенти офиси, икки мамлакат элчихоналари томонидан ташкил этилди.

Ушбу бизнес-форумда 80 нафардан ортиқ компаниялар, эронлик ва ўзбекистонлик тадбиркорлар, илм-фан, давлат бошқарув органлари, ҳокимлик ва идоралар вакиллари иштирок этди.

Тадбирда Олий таълим, фан ва инновациялар вазирлиги, Инновацион ривожланиш агентлиги, Савдо-саноат палатаси раҳбарлари ҳамда тадбиркорлар ўз маърузаларида Ўзбекистон ва Эрон ўртасидаги иқтисодий, ижтимоий, шунингдек, инновацион ва илм-фан соҳасидаги ҳамкорликни янги поғонага чиқариш долзарб эканлигини билдирдилар.

Форумда сўзга чиққан Эрон элчиси Муҳаммадали Искандарий икки мамлакат ўртасида технологиялар соҳасидаги ҳамкорликнинг муҳим жиҳатларини таъкидлади.

"Биринчидан, технологиялар соҳасида киритилган ҳар қандай харажат каттароқ фойда келтиради. Иккинчидан, халқ фаровонлиги ва тараққиёти технологик маҳсулотлар ишлаб чикарилишига боғлиқ. Учинчидан, технологиялар соҳасидаги камчиликларни бартараф этиш анча қийинроқ ва оғирроқдир. Тўртинчидан хорижий ҳамкасблар билан ҳамкорлик қилмасдан туриб технологиялар соҳасида тараққиётга эришиш қийин бўлади", деди элчи.

Эроннинг Илм-фан, технологиялар ва билимга асосланган иқтисодиёт бўйича вице-президенти офиси вакиллари ҳам Ўзбекистонда фаолият юритаётган форс тадбиркорлари томонидан ижобий баҳоланаётган шароитлар, бошқа тадбиркорлик субъектларининг ҳам юртимизга бизнес қилишга иштиёқи юқори эканлигини маълум қилишди.

Фармацевтика ва соғлиқни сақлаш, қишлоқ хўжалиги, чорвачилик ва ветеринария, ахборот технологиялари, нефть-газ ва кимёвий технологиялар, кончилик ва металлургия саноати соҳалариди бўлиб ўтган B2B шаклидаги учрашувларда эронлик тадбиркорлар ўзбекистонлик ҳамкорлари билан янги инновацион маҳсулотлар ишлаб чиқариш имконияларини муҳокама қилдилар.

Тадбир доирасида Эроннинг "Tamin Petro" ва  "GAAMELECTRIC" каби йирик компаниялари ўзларининг инновацион маҳсулотларини намойиш қилмоқда.