ЛОНДОН, 19 август. "Дунё" АА/. Ўзбекистон элчиси Равшан Усманов Британиянинг "Deecon Consulting" компанияси ижрочи директори Даррен Гиллард билан учрашув ўтказди, деб хабар қилмоқда "Дунё" АА мухбири.

Мулоқот аввалида Даррен Гиллард ташкилот фаолияти ҳақида батафсил маълумот берди. Қайд этилишича, ҳозирги кунда компания турли йўналишлардаги инфратузилма лойиҳалари бўйича консалтинг хизматларини тақдим этиб келмоқда.

"Ўзбекистоннинг транспорт тизими, шаҳарларнинг ички автобус йўналишларини лойиҳалаштириш ва бошқариш бўйича хорижий компанияларни ҳамкорликка жалб этишга кўмаклашишимиз мумкин", деди у.

Томонлар мазкур йўналишларда ҳамкорлик алоқаларини янада жадаллаштириш мақсадида Ўзбекистоннинг тегишли ташкилотлари билан икки томонлама музокаралар ташкил этиш ва "Deecon Consulting" компанияси вакилларининг юртимизга сафарини уюштириш тўғрисида келишиб олинди.

"Deecon Consulting" компанияси телекоммуникация, энергетика, транспорт, қурилиш, қайта тикланадиган энергия ва инфратузилма инвестициялари бўйича маслаҳатлар бериш ҳамда тадқиқот ишларини олиб бориш билан шуғулланади. Шунингдек, мазкур ташкилот халқаро молия ташкилотлари ва нуфузли компаниялардан капитал жалб қилиш бўйича консалтинг хизматларини кўрсатади.