ВАРШАВА, 21 апрель. /“Дунё” АА/. Польшанинг “Ekoszalin” нашрида Кошалин шаҳри делегациясининг Ўзбекистонга амалга оширган хизмат сафарига бағишланган мақола эълон қилинди, деб хабар бермоқда “Дунё” АА мухбири.

Мақолада ёзилишича, делегация аъзолари қатор учрашувларда иштирок этиб, Ўзбекистон–Польша ўртасида иқтисодий ҳамкорликни ривожлантириш бўйича музокаралар олиб борган.

Кошалин шаҳар мэри Томаш Соберай бошчилик қилган сафар давомида Наманган вилояти раҳбарияти, жумладан, ҳоким Шавкат Абдураззоқов ҳамда маҳаллий идоралар вакиллари билан турли мулоқотлар ташкил этилган.

Суҳбат жараёнида узоқ муддатли ҳамкорликни йўлга қўйиш, иқтисодий ва инвестициявий алоқаларнинг аниқ йўналишлари белгилаб олинди. Шунингдек, делегация ҳудуднинг иқтисодий салоҳиятини ўрганиш учун маҳаллий корхоналарга ташриф буюриб, тадбиркорлар билан мулоқот қилди.

Чуст шаҳрига алоҳида эътибор қаратилди. У ерда поляк вакиллари замонавий ишлаб чиқариш билан бирга миллий ҳунармандчилик анъаналари билан ҳам танишди.

Ўзбекистоннинг Польшадаги элчихонаси кўмагида ташкил этилган ташриф доирасида томонлар ҳамкорликни янада кенгайтириш, шериклик асосида янги лойиҳалар ишлаб чиқиш борасида фикр-мулоҳаза алмашган.