ТОШКЕНТ, 29 апрель. /"Дунё" АА/. Таиланд пойтахти Бангкок шаҳри мезбонлик қилган дзюдо бўйича Осиё чемпионати ўз якунига етди, деб хабар қилмоқда "Дунё" АА мухбири.

Миллий Олимпия қўмитаси маълумотига кўра, мусобақанинг сўнгги кунида аралаш жамоавий дастур бўйича ғолиб ва совриндорлар аниқланди.

Ушбу дастурда Ўзбекистон дзюдочилари финалгача бўлган йўлни мардонавор босиб ўтишди. Улар дастлаб Тожикистон, сўнг Корея Республикаси жамоаларини 4:0 ҳисобида мағлубиятга учратишди. Афсуски, чемпионлик баҳсида дзюдо ватани бўлмиш Япония термасига 1:4 ҳисобида имконият бой берилди. Якунда полвонларимиз мусобақани кумуш медаль билан якунладилар.