АШХОБОД, 27 апрель. /"Дунё" АА/. Шу йилнинг 22-25 апрель кунлари Ашхобод Олимпия шаҳарчасида жойлашган Жанг санъати спорт мажмуасида туркман кураши ва белбоғли кураш бўйича халқаро мусобақа бўлиб ўтди, деб хабар қилмоқда "Дунё" АА мухбири.

13 та давлатдан полвонлар иштирок этган мазкур турнир анъанавий яккакураш турлари дунёсида муҳим воқеа бўлди.

Мазкур турнирда Ўзбекистон терма жамоаси мамлакатимизнинг етакчи курашчилари билан иштирок этди. Ўзбекистон мусобақада умумжамоа ҳисобида иккинчи ўринни эгаллади.

Хусусан, аёллар ўртасидаги баҳсларда Фарангиз Абдунабиева, Манзура Муйдинова ва Дилафзур Мамажонова ўз вазн тоифаларида олтин медални қўлга киритди. Эркаклар ўртасидаги баҳсларда эса Ойбек Султонов олтин медалга сазовор бўлди. Шунингдек, курашчиларимиз 8 та бронза медалини қўлга киритди.

Ушбу мусобақа минтақа халқлари ўртасида дўстлик ришталарини мустаҳкамлаш, спортчилар ва мураббийлар ўртасида тажриба алмашиш учун муҳим майдон вазифасини бажарди. Ўзбек спортчиларининг мазкур тадбирдаги иштироки эса Ўзбекистон ва Туркманистон ўртасидаги спорт соҳасидаги ҳамкорликни ривожлантиришга қўшилган муносиб ҳисса бўлди.