ТОШКЕНТ, 30 апрель. /"Дунё" АА/. Кеча Хитойнинг Уси шаҳрида таэквондо WT бўйича клублар ўртасидаги Осиё чемпионати бошланди, деб хабар қилмоқда "Дунё" АА мухбири.

Миллий Олимпия қўмитаси маълумотига кўра, мусобақанинг биринчи кунида Ўзбекистон терма жамоаси 2 та олтин, 3 та кумуш ва 4 та бронза медалларини қўлга киритди.

Жумладан, Жасур Жайсунов (-80 кг) ва Марат Мавлонов (+87 кг) олтин,

Шаҳбозбек Тусматов (-74 кг), Шуҳрат Салаев (-87 кг) ва Мадина Мирабзалова (-57 кг) кумуш ҳамда Ёдгор Жўрабоев (-87 кг), Мадина Шониёзова (-46 кг), Лайло Ҳасанова (-49 кг) ва Шаббона Абдувалиева (-57 кг) бронза медалларига сазовор бўлишди.