ТОШКЕНТ, 25 апрель. /"Дунё" АА/. Бугун Бангкок шаҳрида дзюдо бўйича йилнинг энг нуфузли мусобақаларидан бири Осиё чемпионати бошланди, деб хабар қилмоқда "Дунё" АА мухбири.

Миллий Олимпия қўмитаси маълумотига кўра, мусобақанинг дастлабки кунида ўтказилган беллашувларда Ўзбекистон миллий терма жамоаси аъзоси Замохшари Бекмуродов кумуш медалга сазовор бўлди.

-66 кг вазн тоифасида баҳсларда иштирок этган ҳамюртимиз финал йўлида кечган шиддатли курашда бир қатор номдор рақибларини мағлубиятга учратди.

Бироқ олтин медаль учун беллашувда япониялик амалдаги жаҳон чемпиони Рёма Танакага қўшимча дақиқаларда имкониятни бой берди.

Бангкок шаҳрини мезбонлик қилаётган дзюдо бўйича Осиё чемпионатида қитъамизнинг 30 давлатидан 295 нафар полвон медаллар учун курашяпти.