ТОШКЕНТ, 27 июнь. /"Дунё" АА/. Вьетнамда спорт курашлари бўйича ўсмирлар ва ёшлар ўртасидаги Осиё чемпионати якунига етди, деб хабар қилмоқда "Дунё" АА мухбири.

Миллий Олимпия қўмитаси маълумотига кўра, мусобақанинг сўнгги кунида U-17 ёш тоифасида эркин кураш бўйича беллашувлар ўтказилди. Унда Ўзбекистон терма жамоаси аъзолари 2 та кумуш ва 3 та бронза медалларини қўлга киритди.

Хусусан, -51 кг вазн тоифасида Улуғбек Рашидов ва -55 кг вазнда Абдумалик Жалолиддинов кумуш медалларига эга чиқишди. -45 кг вазн тоифасида Миржалол Мукаммилов, -48 кг вазнда Шаҳобиддин Нурманов ва -60 кг вазн тоифасида Фахриддин Насриддинов бронза медалларига сазовор бўлишди.

Мусобақа давомида 1 та олтин, 3 та кумуш ва 5 та бронза медалларини қўлга киритган U-17 ёш тоифасидаги эркин курашчиларимиз умумжамоа ҳисобида учинчи ўринни эгаллади.

Ушбу ёш тоифасидаги спортчиларимиз эса барча йўналишларда жами 5 та олтин, 7 та кумуш ва 12 та бронза медалларини жамғаришди.