ГУМИ, 27 май /Дунё" АА/. Бугун Жанубий Кореянинг Гуми шаҳрида енгил атлетика бўйича Осиё чемпионатининг очилиш маросими бўлиб ўтди, деб хабар қилмоқда "Дунё" АА мухбири.

Чемпионат олдидан Гуми шаҳрида мазкур қитъа биринчилигида иштирок этувчи хорижий мамлакатларнинг Корея Республикасидаги элчиларининг йиғилиши ва Осиё енгил атлетика ассоциациясининг XXVI конгресси бўлиб ўтди.

Конгрессда минтақада енгил атлетикани ривожлантиришга қаратилган долзарб масалалар муҳокама қилинди. Жумладан, миллий федерациялар ўртасидаги ҳамкорликни мустаҳкамлаш, енгил атлетика бўйича қитъавий дастурларни такомиллаштириш масалалари кун тартибидан ўрин олди. 

Мазкур анжуманда Ўзбекистон енгил атлетика федерацияси бош котиби Комилиддин Рўзамуҳамедов ҳам иштирок этди. 

Шунингдек, Осиё енгил атлетика чемпионати доирасида тантанали тақдирлаш маросими бўлиб ўтди. Мазкур маросимда Ўзбекистонда енгил атлетика ривожига қўшган самарали ҳиссаси, юксак профессионаллиги ва фидокорона меҳнати учун Ўзбекистон енгил атлетика федерациясининг ҳудудлар билан ишлаш бўлими бошлиғи Элвира Шиннибекова "Йил аёли" номинацияси бўйича тақдирланди.

Эслатиб ўтамиз, Осиё чемпионатида 54 мамлакатидан келган 500 нафардан зиёд спортчи баҳс олиб боряпти. Ўзбекистон терма жамоаси вакиллари эса югуриш, сакраш, улоқтириш, кўп кураш йўналишларида иштирок этмоқда.

Мусобақалар жорий йилнинг 31 май кунига қадар давом этади.