БЕРЛИН, 27 апрель. /“Дунё” АА/. Германиянинг спортга ихтисослашган “Wette” онлайн нашрида футбол бўйича 2026 йилги жаҳон чемпионатининг гуруҳ босқичларига бағишланган мақола эълон қилинди, деб хабар бермоқда “Дунё” АА мухбири.

Нашрда ёзилишича, “К” гуруҳида Ўзбекистон терма жамоаси Португалия, Колумбия ва Конго жамоалари билан куч синашади. ФИФА рейтингига кўра, (2026 йил апрель ҳолатига кўра), Португалия – 7-ўрин, Колумбия – 16-ўрин, Конго Демократик Республикаси – 54-ўрин, Ўзбекистон эса 59-ўринни эгаллаб турибди.

Экспертлар ушбу кўрсаткичлардан келиб чиқиб, Португалияни гуруҳнинг асосий фаворити сифатида баҳоламоқда. Айниқса, Криштиану Роналду учун бу жаҳон чемпионати фаолиятидаги сўнггиси бўлиши мумкин. У 2006 йилдан буён ҳар бир мундиалда гол урган ягона футболчи сифатида эътироф этилган.

Мақолада таъкидланишича, Ўзбекистон миллий терма жамоаси салоҳияти тўлиқ таърифланмаган ва у рақиблар учун сирли ва кутилмаган натижалар кўрсатиш имконига эга иштирокчи сифатида баҳоланмоқда.

Ўзбекистоннинг ушбу нуфузли мусобақадаги иштироки тарихий аҳамиятга эга. Жамоа илк бор жаҳон чемпионатида қатнашмоқда. Жамоада халқаро даражадаги футболчилар – Элдор Шомуродов, Абдуқодир Ҳусанов, Жалолиддин Машарипов,  Аббосбек Файзуллаев, Отабек Шукуров каби иқтидорли ўйинчилар борлигини унутмаслик керак.

Гуруҳ ўйинлари 2026 йил 17–27 июнь кунлари АҚШ ва Мексика майдонларида бўлиб ўтади. Жумладан:

18 июнь куни Мехикода – Ўзбекистон–Колумбия.

22 июнь куни Хьюстонда – Португалия–Ўзбекистон.

27 июнь куни Гвадалахарада – Конго ДР–Ўзбекистон.

Немис сайтида қайд этилишича, Ўзбекистон терма жамоаси ўз иштирокини 18 июнь куни Колумбияга қарши ўйин билан бошлайди. Таҳлилчиларнинг фикрича, Ўзбекистон жамоаси кутилмаган натижалар қайд этиши ва гуруҳда интрига яратиши ҳам мумкин.