АБУ-ДАБИ, 9 ноябрь. /"Дунё" АА/. Ўзбекистон дипломатик ваколатхонаси раҳбарияти Бирлашган Араб Амирликларининг "ADNH" рекрутинг компаниясининг ходимлар бўйича бош директори Вишал Субба билан  музокара  ўтказдилар, деб хабар қилмоқда "Дунё" АА мухбири.

Учрашувда аввалида БАА вакили Ўзбекистонда миграция соҳасини тартибга солиш, мамлакат фуқароларини қонуний тарзда хорижий давлатларга ишга жойлаштириш, чет эл компаниялари билан ҳамкорликни йўлга қўйиш йўналишидаги ишлар билан таништирилди. 

Вишал Субба "ADNH" компанияси Ўзбекистон томони билан биргаликда ишлашга қизиқиш билдираётганини ва юртимиз меҳнат бозори салоҳиятидан хабардорлигини билдирди.

 Бўлиб ўтган музокаралар якунида "ADNH" рекрутинг компанияси делегациясининг Ўзбекистонга сафарини ташкил этиш, унинг доирасида мамлакатимизнинг тегишли ташкилоти билан меҳнат мигрантларини ишга жойлаштириш бўйича ҳамкорлик меморандумини келишиш ва Тошкент, Самарқанд ва Шаҳрисабз шаҳарларидаги мономарказлар фаолиятини ўрганиш тўғрисида келишувга эришилди.