ЛОНДОН, 27 сентябрь. /“Дунё” АА/. Ўзбекистон элчихонаси дипломатлари Буюк Британиянинг Вустершир графлигидаги “Evesham Vale Growers” қишлоқ хўжалиги фермасида меҳнат қилаётган ватандошлар билан учрашди, деб хабар бермоқда “Дунё” АА мухбири.

Учрашувнинг асосий мақсади ҳамюртларнинг меҳнат ва яшаш шароитларини ўрганиш, уларнинг муаммо ва эҳтиёжларини аниқлаш, профилактик ва тушунтириш тадбирларини ўтказишдан иборат бўлди.

Юртдошларга Буюк Британия қонунчилиги, виза талаблари ва меҳнат шартномалари шартларига қатъий риоя қилиш зарурлиги эслатиб ўтилди.

Ҳуқуқ-тартиботга риоя қилиш ва меҳнат фаолияти билан боғлиқ муаммолар юзага келганда элчихонага мурожаат қилиш бўйича керакли таклиф ва тавсиялар берилди.

Шунингдек, ватандошлар турли ёт ғояларга алданмаслик, низоларнинг олдини олиш ҳамда учинчи шахслар томонидан тарқатилаётган ноқонуний ҳаракатлар ёки чақириқларда иштирок этмасликка чақирилди.

Ижтимоий тармоқлардаги текширилмаган маълумотларга танқидий ёндашиш ва ишончлилиги тасдиқланмаган хабарларни тарқатмаслик зарурлиги алоҳида тушунтирилди.

Учрашув давомида элчихона вакиллари фуқароларнинг мурожаат ва таклифларини тинглади, меҳнат ва маиший шароитлар бўйича тегишли тушунтиришлар берди.

Ватандошларга муаммоли ёки фавқулодда вазиятлар юзага келганда Ўзбекистоннинг Буюк Британиядаги элчихонасига мурожаат қилиш тартиби тушунтирилди.