ОҚТОВ, 28 сентябрь. /"Дунё" АА/. Қозоғистоннинг Оқтов шаҳрида "Mangystau International Tourism Forum" бўлиб ўтди, деб хабар қилмоқда "Дунё" АА мухбири.

Унда Озарбайжон, Туркия, Қирғизистон, Россия, Хитой, Эрон, Тожикистон, Туркманистон, Ўзбекистон ва бошқа давлатлар туризм соҳаси вакиллари қатнашди.

Ўзбекистон делегацияси форумда фаол қатнашиб, юртимиз имкониятларини тақдим этди ва самарали музокаралар ўтказди. Иштирокчиларга Ўзбекистон туризм салоҳияти, янги туристик йўналишлар ва сайёҳларга яратилган қулайликлар ҳақида маълумотлар берилди.

Форум доирасида Ўзбекистон томони Қозоғистон ва бошқа мамлакатларнинг етакчи сайёҳлик компаниялари, турагентликлар ҳамда меҳмонхоналар вакиллари билан учрашувлар ўтказди. Жумладан, "Қарақалпак палас отель" ҳамда "Wyndham Hotels & Resorts" меҳмонхоналар тармоғи раҳбарияти ўртасида Нукус шаҳрида ушбу бренд остида меҳмонхона очиш бўйича дастлабки келишувга эришилди.

Ўзбекистон делегацияси 26-29 сентябрь кунлари Мангистау вилоятида бўлиб ўтадиган "Инфотурда" қатнашади ва 30 сентябрь куни Ўзбекистон туризм салоҳиятига бағишланган тақдимот ўтказади.