ТОШКЕНТ, 30 апрель. /“Дунё” АА/. Чехия Бош вазири Андрей Бабиш Ўзбекистондан жўнаб кетишарафасида Тошкент-Ҳумо халқаро аеропортида “Дунё” АА мухбирига эксклюзив интервью берди:

“Президентингиз делегациямизни қабул қилганидан жуда мамнунман, бизни жуда самимий кутиб олишди”, – деди Чехия ҳукумати раҳбари. – Ўзбекистоннинг ҳар томонлама жадал ривожланиб бораётгани, ресурсларга бойлиги, бу ерда истеъдодли инсонлар кўплиги, айниқса ёшларнинг салоҳияти менда катта таассурот қолдирди.

Ислом цивилизацияси марказини биз ҳам бориб кўрдик. Германияда ишлаш учун 400 нафар ўзбекистонлик ҳамшира немис тилини ўрганаётган мактабда ҳам бўлдим. Бу биз учун жуда қизиқарли. Президентингиз ташаббуси билан Чехиянинг ŠKODA Transportation компанияси билан 10 та поезд бўйича биринчи шартномани имзолашга муваффақ бўлдик. Ишончим комилки, бу ҳали бошланиши. Албатта, компанияларимиз қўшма корхоналар ташкил этиш ва аҳолини иш билан таъминлашдан жуда манфаатдор.

Мен 2019 йилда Бош вазир сифатида биринчи муддатимда бу ерда бўлмаганимдан чиндан ҳам афсусдаман. Чунки кейинги икки йил COVID сабабли анча вақт йўқотдик. Аммо ҳозир биз олдинга ҳаракат қилишга тайёрмиз. Президентингиздан ҳамкорлигимизнинг барча йўналишлари акс этган жуда яхши китоб олдик.

Яна бир бор таъкидлайман: бу ерда эканимдан жуда хурсандман. Бу ер ажойиб инсонлар яшайдиган гўзал мамлакат. Мен учун бу ташриф жуда муваффақиятли бўлди.

Мамлакатда иқтисодий ўсиш юқори суръатда. Давлат қарзи паст ва захиралар катта. Сизлар олтин ва кумуш экспорт қиласизлар, катта мис захираларига ҳам эгасизлар. Хомашё экспортига йўл қўймаслик жуда тўғри стратегия. Хомашёга солиқ жорий этилгани компанияларни уни қўшимча қийматли тайёр маҳсулотга айлантиришга ундашини билиб олдим”.

Чехия ҳукумати раҳбари “Кўксарой” қароргоҳида бўлиб ўтган музокараларда кўтарилган халқаро мавзуларга тўхталар экан, Ўзбекистон Президентининг “Биз ҳозир дунёда содир бўлаётган барча урушларни тўхтатишимиз керак. Одамлар тинч-тотув яшаши керак”, деган фикрига тўлиқ қўшилишини алоҳида таъкидлади.

“Президентингиз ажойиб етакчи ва мен у билан самарали мулоқот қилганимдан жуда хурсандман”, – дея хулоса қилди Чехия Бош вазири.