ЛОНДОН, 12 декабрь. /“Дунё” АА/. Мамлакатимиз элчихонаси дипломатлари “Тhe London Post” нуфузли ахборот порталининг муҳаррири Раза Саидга “Олтин қалам” ХIХ Миллий мукофотининг тегишли диплом, статуетка ва бошқа мукофотларни топширдилар, деб хабар қилмоқда “Дунё” АА мухбири.

Раза Саид Ўзбекистон Журналистлар уюшмаси томонидан ташкил қилинган “Олтин қалам” ХIХ Миллий мукофотининг “Чет эллик журналистларнинг Ўзбекистон ҳақидаги энг яхши материали учун” номинацияси бўйича фахрли 2-ўринни эгаллаган эди.

Совриндор Ўзбекистон ҳукумати ва Журналистлари ижодий уюшмасига чуқур миннатдорчилик билдириб, мамлакатимизда оммавий ахборот воситаларининг фаолияти ва эркинлиги, журналистларнинг ижоди учун яратилаётган шароитлардан мамнунлигини эътироф этди.

Раза Саид Ўзбекистоннинг халқаро майдондаги обрўсини мустаҳкамлашга ҳамда республикада амалга оширилаётган демократик ислоҳотлар ҳақида жаҳон ҳамжамиятига маълумот етказишга қўшаётган ҳиссасини давом эттиришини таъкидлади.