ЛОНДОН, 10 апрель. /“Дунё” АА/. Британиянинг нуфузли “The Financial Times” нашрида айни пайтда Кипрда ўтказилаётган шахмат бўйича даъвогарлар турнирида ёш ўзбек гроссмейстери Жавоҳир Синдаровнинг ёрқин иштироки хусусида мақола эълон қилинди, деб хабар бермоқда “Дунё” АА мухбири.

Дунёнинг етакчи ОАВдан бири ҳисобланган мазкур нашрнинг турнирга бағишланган мақоласида ўзбекистонлик ёш шахматчи Жавоҳир Синдаровнинг юқори савиядаги ўйинига катта баҳо берилган.

Мақолада таъкидланишича, Синдаров аллақачон Кипрда ўтаётган 2026 йилги даъвогарлар турнирида ғалаба қозониш ва ҳиндистонлик жаҳон чемпиони Гукеш Доммаражуга қарши унвон учун баҳс олиб боришда асосий фаворитлардан бирига айланган.

20 ёшли гроссмейстер мусобақани 7 партиядан 6 очко жамғарган ҳолда жуда ишончли бошлади. Айниқса, у турнир фаворитларидан бири ва дунёнинг етакчи шахматчиларидан бўлган Фабиано Каруана устидан қозонган ғалабаси билан катта шов-шувга сабаб бўлди.

Нашрда Синдаровнинг даъвогарлар турнири тарихидаги энг кучли стартлардан бирини амалга оширгани қайд этилган. Унинг муваффақиятида пухта дебют тайёргарлиги ҳал қилувчи омил бўлган. Хусусан, Каруанага қарши партияда у қабул қилинган фарзин гамбитида чуқур таҳлил қилинган янги ғояларни қўллаб, қисқа вақт ичида устунликка эришган.

Кейинги турда эса Синдаров яна бир америкалик гроссмейстер Ҳикару Накамурага қарши ҳам худди шундай стратегик устунликни намоён этди. У рақибининг ўткир вариант танлашини аниқ башорат қилиб, янада пухта тайёргарлик орқали устунликни қўлга киритди. Мураккаб позицияларда ишончли ўйнаши ва рақиб хатоларидан самарали фойдаланиши унинг устунлигини янада мустаҳкамлади.

Хулоса қилиб айтганда, Жавоҳир Синдаров аллақачон жаҳон чемпионига муносиб даражада ўйин намоён этмоқда. Унинг мазкур турнирдаги иштироки замонавий шахмат оламининг энг ёрқин ва илҳомлантирувчи воқеаларидан бири сифатида баҳоланмоқда.