НОВОСИБИРСК, 7 март. /“Дунё” АА/. Ўзбекистон бош консули Новосибирск вилояти губернатори Андрей Травников билан учрашди, дея хабар қилмоқда “Дунё” АА мухбири.

Мазкур тадбирда Қирғизистон, Тожикистон ва Мьянма консуллик идоралари раҳбарлари, Арманистон ва Қозоғистоннинг фахрий консуллари иштирок этди.

Губернатор Андрей Травников иқтисодий, савдо, илмий-техник ва маданий-гуманитар соҳалардаги ҳамкорлик изчил ривожланиб бораётгани, Новосибирск ва Ўзбекистон ўртасидаги дўстлик алоқалари ўзаро қўллаб-қувватлаш тамойилларига асосланганини қайд этди.

Ўзбекистон Бош консули Аслам Акбаров 2025 йилда амалга оширилган ҳудудлараро ҳамкорлик натижалари ва жорий йилга мўлжалланган режалар ҳақида маълумот берди. Хусусан, Сурхондарё ва Новосибирск вилоятлари ўртасида савдо-иқтисодий ҳамда таълим соҳаларидаги алоқалар фаол ривожланиб бораётганини таъкидлади.

Новосибирск шаҳридаги “Азия-Сибирь” ўзбек улгуржи тақсимот савдо маркази фаолияти, 2025 йил июль ойида ўтказилган бизнес-форум ва таълим муассасалари ўртасидаги делегациялар алмашинуви ҳамкорликнинг муҳим натижалари сифатида қайд этилди.

Режага кўра, Новосибирск вилояти делегацияси шу йил 20–22 апрель кунлари Тошкентда бўлиб ўтадиган “ИННОПРОМ. Марказий Осиё” халқаро саноат кўргазмасида иштирок этади. Шунингдек, жорий йил ёзида Новосибирскда иккинчи бизнес-форум ташкил этилиши ва унда Фарғона ҳамда Сурхондарё вилоятлари ишбилармонлари қатнашиши кўзда тутилган.