ҚОҲИРА, ­­25 декабрь. /"Дунё" АА/. Мисрнинг “Al-Diplomasi” ахборот агентлигида сўнгги ўн йилликда Ўзбекистон иқтисодиётини ривожлантириш ва халқаро ишбилармонлик ҳамкорлигини шакллантиришда кўргазма ва ишбилармонлик тадбирларининг ролига бағишланган мақола эълон қилинди, деб хабар бермоқда “Дунё” АА мухбири.

Мақолада қайд этилишича, Ўзбекистоннинг машҳур “Iteca Exhibitions” компанияси ўз фаолиятини 1995 йилда бошлаган ва мустақил Ўзбекистонда янги форматдаги кўргазма индустриясини - хорижий компаниялар иштироки ва юқори халқаро талабларга жавоб беришга йўналтирилган соҳани шакллантиришга асос солган.

Муаллифнинг таъкидлашича, кўргазма соҳаси ҳар доим мамлакатдаги прогрессив ўзгаришларнинг кўрсаткичи бўлиб келган, бизнеснинг профессионаллик даражаси ва ривожланишга тайёрлигини акс эттиради. Бугунги кунда бозор фаол ўзгармоқда: янги операторлар ва платформалар пайдо бўлмоқда, тадбирларни ўтказишнинг замонавий форматлари жорий этилмоқда, бу эса бутун саноат учун юқори стандартлар ва янги йўналишларни шакллантирмоқда.

“Iteca Exhibitions”нинг ўттиз йиллик юбилей мавсуми натижаларига алоҳида эътибор қаратилган бўлиб, унинг доирасида турли мамлакатлардан минглаб компаниялар ва мутахассислар иштирокида ўнлаб халқаро тадбирлар ташкил этилган. 2025 йилги кўргазма мавсуми давомида мутахассислар кенг кўламли йўналишлар бўйича инновациялар билан танишишлари мумкин бўлди. Кўргазмаларда нафақат жаҳон етакчилари ва таниқли брендлар, балки маҳаллий ишлаб чиқарувчиларнинг сезиларли улуши ҳам иштирок этди, бу эса маҳаллий корхоналарнинг ютуқларини намойиш этиш ва уларнинг экспорт салоҳиятини оширишга ёрдам берди.

Нашрда ёзилишича, юбилей мавсуми натижалари келгуси фаолият учун юқори марраларни белгилаб беради. 2026 йилда 22 та кўргазма ва 5 та конференция ўтказиш, миллий ишлаб чиқарувчиларни қўллаб-қувватлаш, инвестицияларни жалб қилиш ва иқтисодиёт тармоқларини ривожлантиришга қаратилган янги лойиҳаларни амалга ошириш режалаштирилган.

Хулоса қилиб айтганда, кўргазма саноати мамлакатнинг барқарор иқтисодий ўсишининг муҳим омилларидан бирига айлангани ва Янги Ўзбекистонни ривожлантиришнинг стратегик вазифаларини амалга оширишда муҳим роль ўйнашда давом этаётгани таъкидланган.