БУДА-КОШЕЛЕВО, 3 октябрь. /"Дунё" АА/. Иккинчи жаҳон уруши вақтида ҳалок бўлган ҳамюртимиз Абдуллажон Дадабоевнинг хоки Беларусдан Ўзбекистонга олиб келинди, деб хабар қилмоқда "Дунё" АА мухбири.

Абдуллажон Дадабоев 1918 йилда Фарғона вилояти Ўзбекистон туманида туғилган. Иккинчи жаҳон уруши даврида Беларусни душманлардан ҳимоя қилиш вақтида қаҳрамонларча ҳалок бўлган. Ҳамюртимизнинг ҳоки Ўзбекистон Мудофаа вазирлиги ва мамлакатимиз элчихона вакилларига топширилди.

Хотира тадбирида Буда-Кошелево тумани Ижроия қўмитаси раҳбарияти, кенг жамоатчилик, фахрийлар ва ёшлар қатнашди.

Туман Ижроия қўмитаси раиси Валентин Ундрул ўз нутқида орадан шунча йиллар ўтган бўлса-да, ўша даҳшатли уруш ҳамон янги-янги фактлар, воқеалар, тарихлар билан ўзини эслатиб турганини ва аниқланаётган ҳар бир далил инсон ҳаётидаги катта фожиа эканини таъкидлади. Унинг айтишича, жорий йилда олиб борилган қидирув ишлари давомида Фарғона вилоятида 1918 йилда туғилган жангчи Абдуллажон Дадабаевнинг тана қолдиқлари ҳамда унга тегишли жиҳозлар ва ўқ-дорилар Рогин қишлоғи ҳудудида олиб борилган қидирув ишлари давомида топилган.

Туман раҳбари қидирув ишларини олиб борган Беларусь Мудофаа вазирлигининг 52-ихтисослаштирилган қидирув батальони ва Гомел кадетлар билим юртининг "Қизил погонлар" қидирув клубига миннатдорлик билдирди.

Ўзбек халқининг қаҳрамон фарзанди Абдуллажон Дадабаевнинг хоки 27 сентябрь куни Минск шаҳридан Ўзбекистонга олиб келинди.