ТОШКЕНТ, 20 апрель. /“Дунё” АА/. Покистоннинг йирик тўқимачилик компанияларидан бири “Indus Apparel Group” ижрочи директори Хуррам Ҳарун мамлакатимизга ташриф буюрди, деб хабар бермоқда “Дунё” АА мухбири.

Ташриф давомида Хуррам Ҳарун Енгил саноатни ривожлантириш агентлиги директори ўринбосари Рухулло Зикриллаев билан музокара ўтказди.

Томонлар тўқимачилик ва ип-калава тармоқларида икки томонлама шерикликни кенгайтириш масалаларини муҳокама қилди. Юқори қўшилган қийматга эга маҳсулотлар ишлаб чиқариш учун ишлаб чиқариш кооперациясини яратиш, экспорт йўналишларини диверсификация қилишга алоҳида эътибор қаратилди.

Шу билан бирга, “ZELAL TEKSTIL” корхонаси таъсисчиси Фират Дениз билан замонавий технологик жараёнлари ва тайёр маҳсулотларнинг экспорт имкониятлари муҳокама қилинди.

Инвестиция муҳитини таҳлил қилиш мақсадида Хуррам Ҳарун Тошкент, Наманган, Андижон, Самарқанд ва Бухоро вилоятларида бўлди. Ушбу ҳудудларда у “Tashkent Cotton Textile”, “Chust Textile”, “Asaka Textile”, “Khantex Group”, “Buxoro Cotton Textile” ва “Merganteks” каби йирик ишлаб чиқарувчилар фаолияти билан танишди. Инвестор Ўзбекистон корхоналарининг ишлаб чиқариш қувватлари, техник жиҳозланиш даражаси ва экспорт салоҳиятини ўрганди.

Музокаралар якунлари бўйича томонлар қисқа муддатларда қўшма инвестиция лойиҳаларини ишга туширишга келишиб олди. Учрашув иштирокчилари саноат мулоқотини мустаҳкамлаш ҳамда Ўзбекистон ва Покистон ўртасидаги тўқимачилик соҳасидаги ҳамкорликни янги босқичга олиб чиқишга қаратилган келгуси амалий ҳаракатлар режаси белгиланди.