БАҒДОД, 25 декабрь. /“Дунё” АА/. Мамлакатимизнинг Кувайтдаги элчихонаси ҳамда Ироқ Иқтисодий кенгаши билан ҳамкорликда “Ўзбекистон­­­­­­­­-­­­­­Ироқ­ бизнес форуми” ташкил этилди, деб хабар қилмоқда “Дунё” АА мухбири.

Ўзбекистон бизнес-делегацияси таркибидан озиқ-овқат, тўқимачилик, фармацевтика, электротехника, мебелсозлик ва қурилиш материаллари каби юқори экспорт салоҳиятига эга йўналишларда фаолият юритаётган 25 та йирик компания вакиллари ўрин олди.

Тадбирда 200 дан ортиқ ироқлик инвестор, импортёр ва бизнесменлар қатнашди.

Форум давомида Ўзбекистон ­­­­­Инвестициялар, саноат ва савдо вазири ўринбосари Шоҳрух Ғуламов, Савдо-саноат палатаси раиси Даврон Вахабов, Енгил саноатни ривожлантириш агентлиги директори ўринбосари Рухулло Зикриллаев, “Ўзбекнефтегаз”, “Ўзэлтехсаноат” ва “Ўзтўқимачиликсаноат” вакиллари юртимизда иқтисодий соҳада амалга оширилаётган ислоҳотлар ҳақида тўхталиб ўтди.

Вакилларимиз Ўзбекистоннинг инвестициявий жозибадорлиги, саноат ва экспорт салоҳиятига бағишланган тақдимотлар намойиш қилди

Халқаро тадбирда “Ўзбекистон ва Ироқ ўртасидаги савдо алмашинувини кучайтириш ва кенгайтириш” ҳамда “Инвестициялар учун истиқболли имкониятлар” мавзуларида 2 та алоҳида панель сессиялари ташкил этилди.

Икки давлат ишбилармон доира вакиллари ўртасида В2В учрашувлар ташкил этилиб, ўзаро ҳамкорликнинг истиқболли йўналишлари муҳокама қилинди.

Музокаралар самарадорлигини таъминлаш мақсадида Ўзбекистонда ишлаб чиқарилган текстиль, озиқ-овқат, қурилиш ва бошқа турдаги маҳсулотлари кўргазмаси ташкил этилди.

Кўргазмада Ўзбекистондаги “Sam Rafoat Tekstil”, “Artel electronics manufacturing”, “Radiks”, “Samarkand­-England eco-medical”, “Zafarxon” каби компанияларининг маҳсулотлари бизнесменларга намойиш этилди.